Chexiya senati spikeri Milosh Vistrchil ma’lum qilishicha, 19-oktabr kuni senatning konstitutsiyaviy qo‘mitasi mamlakatning 77 yoshli prezidenti Milosh Zemanning kasalligi munosabati bilan keyingi qadamlarni muhokama qiladi, deb yozadi Meduza.

Milosh Zeman

Foto: Getty Images

Vistrchilning aytishicha, shifokorlarning xulosasiga ko‘ra, Zeman sog‘lig‘i tufayli o‘z majburiyatlarini bajara olmaydi, “uzoq muddatli prognoz esa o‘ta noaniq deb baholanmoqda”.

Senat rahbariga ko‘ra, senatorlar Chexiya konstitutsiyasining 66-moddasini amalga oshirish-oshirmaslikni muhokama qiladi, unga muvofiq prezidentning vafoti yoki kasalligi munosabati bilan uning vakolatlarining bir qismi vaqtinchalik senat rahbariga, yana bir qismi esa vakillar palatasi spikeriga o‘tadi. “Boshqa variant, afsuski, yo‘q — biz konstitutsiyaning 66-moddasini qachon va qay tarzda kuchga kiritishni muhokama qilishimizga to‘g‘ri keladi”, — dedi Milosh Vistrchil.

Prezident ma’muriyati rahbari Vratislav Minarj Chexiya senati spikerini matbuot o‘yinida va ikkiyuzlamachilikda aybladi.

10-oktabr kuni Milosh Zeman surunkali kasallik bilan bog‘liq asoratlar tufayli Pragadagi harbiy gospitalga yotqizilgandi. Shifokorlar Zemanga qo‘yilgan tashxisni oshkor qilmayapti.

Chexiya prezidenti parlament saylovlarida “Birgalikda” muxolifat koalitsiyasiga yutqazgan “Norozi fuqarolar aksiyasi” partiyasi rahbari, bosh vazir Andrey Babish bilan uchrashuvdan keyin reanimatsiyaga tushgandi.

Chexiyaning Novinky nashri manbalarga tayangan holda, prezidentning kasalxonaga yotqizilishiga sabab buyrak muammosi bo‘lsa kerak, deya yozdi.

Bundan avval Zeman sentabr oyida sakkiz kun Markaziy harbiy kasalxonaga yotqizilgan edi. Praga qal’asi buni rejalashtirilgan muolaja deb aytdi. Zeman 2013-yilda Chexiya Respublikasi prezidentiga aylangan. 2018-yilda u ikkinchi besh yillik muddatga qayta saylangan.