Mixail Saakashvili ochlikni to‘xtatmayapti, lekin shifokorlar tavsiya qilgan dorilarni ichishga tayyor

Gruziyaning uchinchi prezidenti Mixail Saakashvili yigirma kundan buyon Rustav qamog‘ida o‘zi e’lon qilgan ochlikni davom ettirmoqda va u oxirigacha kurashishini bildirgan. Shunga qaramay mamlakat sobiq rahbari shifokorlar maslahat kengashi tavsiya qilgan dorilarni ichiga rozi bo‘ldi. Bu haqda mijozi bilan uchrashgan advokat Dmitriy Sadzaglishvili ma’lum qildi va Saakashvilining navbatdagi xatini jurnalistlarga topshirdi, deb yozmoqda “Kommersant”.

“Toki hibsda saqlanayotgan ekanman har qanday holatda ham ochlikni to‘xtatmayman va o‘limga tayyorman”,— deyiladi Saakashvili maktubida. Biroq u ishchanlik va fikrlash qobiliyatini saqlab qolish, hozirgi jarayonlarda ishtirok etish, Gruziyaga foyda keltirish, hushidan ketmaslik uchun zarur tibbiyot vositalarini qabul qilishga tayyor.

Avvalroq shifokorlar konsiliumi Gruziya sog‘liqni saqlash vazirligi vakillari va qamoqxonadagi tibbiyot xodimlari ishtirokida uni ko‘rikdan o‘tkazgandi. Ular sobiq davlat rahbarining ancha kuch yo‘qotgani, biroq uning sog‘lig‘iga xavf soladigan kasalliklar yo‘qligi haqida tashxis qo‘ygan. Konsilium Mixail Saakashvilini shifoxonaga ko‘chirishni tavsiya etgan.

Gruziya adliya vaziri Rati Bregadze shifokorlar kengashiga javoban ularning barcha tavsiyalariga qat’iy rioya etilishini bildirgan. Vazir Mixail Saakashvili shifoxonaga o‘tkazilishi, biroq bu uning partiyadoshlari hamda tarafdorlari istaganidek fuqarolik muassasasi, shahar kasalxonasi emas balki jazoni ijro etish maskanidagi tibbiyot bo‘limi bo‘lishini tushuntirgan.

“Kommersant” qamoqxona amaliyoti va sobiq prezident bilan bog‘liq vaziyatdan xabardor manbalariga asoslanib bergan ma’lumotlarga ko‘ra ochlik e’lon qilgan siyosatchi rozilik bildirsa, ochlik va tashnalikdan keyingi charchoqni kamaytirish, Saakashvilining ahvoli yomonlashmasligi uchun unga osma ukol vositasida zarur preparatlar yuborilishi mumkin.

Vaziyat keskinlashayotgan vaqtda Mixail Saakashvili o‘zi kutmagan tomondan yana bir zarba qabul qilib oldi: Gruziya patriarxining o‘rinbosari Ilya Ikkinchi, Shio mitropoliti sobiq prezidentning ochlik e’lon qilganiga munosabat bildirib, yomonlik kechirilishi emas, balki zulm uchun jazo muqarrarligi haqida gapirdi. Shu tariqa Gruziya pravoslav cherkovi rahbariyati Mixail Saakashvilini himoya qilish va uning hayoti uchun kurashish haqidagi chaqiriqlarga javob qaytardi.

Bu sobiq prezident tarafdorlarining keskin noroziligiga sabab bo‘ldi. Saakashvilining advokati, “Mtavari Arxi” (Asosiy kanal) telekanali rahbari Nika Gvaramiya rohibning Moskvada tahsil olgani va Gruziyaga qarshi siyosatni yoqlaydiganlardan biri ekani haqida teleko‘rsatuvda chiqish qilgan.