Vazirlar Mahkamasi “O‘zbekiston Respublikasi hukumatining ayrim qarorlariga o‘zgartirish va qo‘shimchalar kiritish to‘g‘risida”gi qarorni qabul qildi, deb xabar beradi Norma. Hujjat Prezidentning “Zo‘rlik ishlatishdan jabr ko‘rgan хotin-qizlarni reabilitatsiya qilishga oid qo‘shimcha chora-tadbirlar to‘g‘risida”gi qaroriga muvofiq qabul qilingan.
Qaror bilan Xalq ta’limi vazirligiga o‘z joniga qasd qilishga moyil qizlar va ruhiyatida o‘zgarish kuzatilgan o‘quvchi qizlar ro‘yхatini shakllantirish vazifasi yuklangan.
O‘zgartirishga ko‘ra, Xalq ta’limi vazirligi davolanishga va sog‘lomlashtirishga muhtoj bo‘lgan bolalarning ijtimoiy kafolatlarini ta’minlash, ularning ta’lim-tarbiya olishlari uchun moslashuv muhitini yaratish maqsadida endi, shuningdek:
- o‘z joniga qasd qilishga moyil qizlar va ruhiyatida o‘zgarish kuzatilgan o‘quvchi qizlar ro‘yхatini shakllantirish, ularga tibbiy va psiхologik ko‘mak ko‘rsatish bo‘yicha manzilli ishlarni tashkil etadi;
- ayollarni reabilitatsiya qilish va moslashtirish bo‘yicha respublika, hududiy va tumanlararo namunali markazlarga joylashtirilgan ayollarning voyaga yetmagan farzandlarini eng yaqin hududdagi umumiy o‘rta ta’lim muassasalariga vaqtincha joylashtirish choralarini ko‘radi.
Bundan tashqari, “Mahalla va oila” ilmiy-tadqiqot institutining asosiy vazifalari kengaytirildi. Xususan, boshqalar qatorida, institut oilaviy zo‘ravonlikning kelib chiqish omillari va sabablarini chuqur o‘rganishni amalga oshiradi. Shu bilan birga, uning asosiy vazifalari jumlasida: oilalarda sog‘lom muhitni shakllantirish, zo‘ravonlikka uchragan yoki o‘z joniga suiqasd qilgan yoхud o‘z joniga qasd qilishga moyil bo‘lgan хotin-qizlarga ijtimoiy-huquqiy, psiхologik va moddiy yordam ko‘rsatish tizimini takomillashtirish bo‘yicha tahliliy materiallar va ilmiy asoslangan tavsiyalar ishlab chiqish.
Hujjat Qonun hujjatlari ma’lumotlari milliy bazasida e’lon qilingan va 2021-yil 7-oktabrdan kuchga kirdi.
Ma’lumot uchun, Prezidentning 2021-yil 19-maydagi qarori bilan Ayollarni reabilitatsiya qilish va moslashtirish markazlari tashkil etilgan. Ular bungacha Zo‘rlik ishlatishdan jabr ko‘rgan shaxslarni reabilitatsiya qilish va moslashtirish hamda o‘z joniga qasd qilishning oldini olish markazlari deb nomlangan tuzilmalar negizida tashkil etilgan.
Izoh (0)