Вазирлар Маҳкамаси «Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида»ги қарорни қабул қилди, деб хабар беради Norma. Ҳужжат Президентнинг «Зўрлик ишлатишдан жабр кўрган хотин-қизларни реабилитация қилишга оид қўшимча чора-тадбирлар тўғрисида»ги қарорига мувофиқ қабул қилинган.
Қарор билан Халқ таълими вазирлигига ўз жонига қасд қилишга мойил қизлар ва руҳиятида ўзгариш кузатилган ўқувчи қизлар рўйхатини шакллантириш вазифаси юкланган.
Ўзгартиришга кўра, Халқ таълими вазирлиги даволанишга ва соғломлаштиришга муҳтож бўлган болаларнинг ижтимоий кафолатларини таъминлаш, уларнинг таълим-тарбия олишлари учун мослашув муҳитини яратиш мақсадида энди, шунингдек:
- ўз жонига қасд қилишга мойил қизлар ва руҳиятида ўзгариш кузатилган ўқувчи қизлар рўйхатини шакллантириш, уларга тиббий ва психологик кўмак кўрсатиш бўйича манзилли ишларни ташкил этади;
- аёлларни реабилитация қилиш ва мослаштириш бўйича республика, ҳудудий ва туманлараро намунали марказларга жойлаштирилган аёлларнинг вояга етмаган фарзандларини энг яқин ҳудуддаги умумий ўрта таълим муассасаларига вақтинча жойлаштириш чораларини кўради.
Бундан ташқари, «Маҳалла ва оила» илмий-тадқиқот институтининг асосий вазифалари кенгайтирилди. Хусусан, бошқалар қаторида, институт оилавий зўравонликнинг келиб чиқиш омиллари ва сабабларини чуқур ўрганишни амалга оширади. Шу билан бирга, унинг асосий вазифалари жумласида: оилаларда соғлом муҳитни шакллантириш, зўравонликка учраган ёки ўз жонига суиқасд қилган ёхуд ўз жонига қасд қилишга мойил бўлган хотин-қизларга ижтимоий-ҳуқуқий, психологик ва моддий ёрдам кўрсатиш тизимини такомиллаштириш бўйича таҳлилий материаллар ва илмий асосланган тавсиялар ишлаб чиқиш.
Ҳужжат Қонун ҳужжатлари маълумотлари миллий базасида эълон қилинган ва 2021 йил 7 октябрдан кучга кирди.
Маълумот учун, Президентнинг 2021 йил 19 майдаги қарори билан Аёлларни реабилитация қилиш ва мослаштириш марказлари ташкил этилган. Улар бунгача Зўрлик ишлатишдан жабр кўрган шахсларни реабилитация қилиш ва мослаштириш ҳамда ўз жонига қасд қилишнинг олдини олиш марказлари деб номланган тузилмалар негизида ташкил этилган.
Изоҳ (0)