Dunyo va o‘zbek sportiga oid 8-oktabr kunining eng muhim xabarlari dayjesti bilan tanishing.
O‘zbekiston
Og‘ir atletika bo‘yicha o‘smirlar o‘rtasidagi jahon chempionatida 3 ta medal qo‘lga kiritildiSaudiya Arabistonining Jidda shahrida o‘smirlar o‘rtasida jahon chempionati o‘tkazilmoqda.
Unda -55 kg vazn toifasida ishtirok etgan Ozoda Hojiyeva 2 ta medalga sazovor bo‘ldi. Ozoda siltab ko‘tarish bahslarida ilk urinishda — 92 kg, ikkinchi urinishda — 95 kg toshni o‘ziga bo‘ysundirdi. So‘nggi urinishda esa 98 kilogrammni ko‘tara olmadi. Shunday bo‘lsa-da, u siltab ko‘tarishda uchinchi o‘rinni band etdi.
Yakuniy hisobga ko‘ra, 172 kg natija qayd etgan Ozoda ikkinchi o‘rinni egalladi va O‘zbekiston terma jamoasi hisobiga jahon chempionatining birinchi kumush medalini qo‘shib qo‘ydi.
-73 kg vazn toifasida ishtirok etgan Diyorbek Ermatov esa dast ko‘tarish mashqida 132 kg natija qayd etdi va ushbu yo‘nalishda oltin medalni qo‘lga kiritdi. Bu O‘zbekiston terma jamoasi uchun musobaqadagi dastlabki oltin medal bo‘ldi.
Shuningdek, Ermatov siltab ko‘tarish bahslarida ham o‘z kuchini sinab ko‘rdi. Biroq sovrinli pog‘onalardan joy ololmadi — 5-o‘rin.
Superliganing sentabr oyidagi eng yaxshilari aniqlandi
O‘zbekiston professional futbol ligasi (PFL) sentabr oyining eng yaxshilarini aniqlash uchun o‘tkazilgan so‘rovnoma natijalarini e’lon qildi.
Unga ko‘ra, “Nasaf” bosh murabbiyi Ro‘ziqul Berdiyev sentabr oyining eng yaxshi murabbiyi deb topildi. Qarshi klubi Berdiyev qo‘l ostida 3 o‘yinda 3 g‘alaba qayd etdi. To‘plar nisbati esa 9:1 ni tashkil qildi.
Jamoa hujumchisi Husayn Norchayev esa oyning eng yaxshi futbolchisi deb topildi. Norchayev 3 o‘yinda o‘z nomiga 3 ta gol yozdirib qo‘ydi.
Jahon
Zidanni ortda qoldirgan Benzema
“Real” hujumchisi Karim Benzema Millatlar Ligasi doirasida Belgiyaga qarshi o‘yinda (3:2) gol urdi.
Bu hujumchi uchun “uchranglilar” safidagi 32-gol bo‘ldi. Shu tariqa Benzema terma jamoadagi gollar soni bo‘yicha sobiq yarim himoyachi Zinedin Zidanni (31 ta gol) ortda qoldirdi va 6-o‘ringa ko‘tarildi. To‘purarlar ro‘yxatini esa hamon hisobida 51 ta gol bo‘lgan Tyerri Anri boshqarmoqda.
“Billur oyoqli” Azar yana jarohat oldi
Belgiya terma jamoasi yarim himoyachisi Eden Azar Fransiyaga qarshi o‘yinda son mushaklarini shikastlab olgani ma’lum bo‘ldi.
Biroq Marca uning jarohati jiddiy emasligi va tekshiruvlar natijasi mushaklarga ortiqcha yuklama tushganini ko‘rsatgan deb yozmoqda.
Qayd etish kerak, Azar 2021/22-yilgi mavsumda birorta ham o‘yinda to‘liq harakat qilmadi.
APLning sentabr oyidagi eng yaxshilari aniqlandi
“Manchester Yunayted” hujumchisi Krishtianu Ronaldu APLda oyning eng yaxshi futbolchisi deb topildi.
Portugaliyalik sentabr oyida Angliya Premyer Ligasida 3 ta o‘yin o‘tkazib, 3 ta gol urdi.
Shu tariqa Ronaldu Premyer Ligada 5-marta oyning eng yaxshi o‘yinchisi bo‘ldi. U oxirgi marta mazkur sovringa 2008-yilda ega chiqqandi.
“Arsenal” bosh murabbiyi Mikel Arteta esa o‘tgan oyning eng yaxshi murabbiyi bo‘ldi. Uning qo‘l ostidagi “kanonirlar” sentabr oyidagi 3 ta o‘yinda ham g‘alaba qozondi.
Angliyaning “Nyukasl” klubiga yangi bosh murabbiy tayinlanishi mumkin
Saudiyaliklar tomonidan sotib olgan “Nyukasl” yangi murabbiy qidirishni boshlab yubordi. La Gazzetta dello Sport nashriga ko‘ra klubning asosiy maqsadi Antonio Konte bo‘lib turibdi. Biroq tomonlarning hali muzokaralarni boshlamagani qo‘shimcha qilingan.
Shuningdek, nomzodlar qatorida Stiven Jerrard va Frenk Lempard ham tilga olinmoqda.
Avvalroq Saudiya Arabistoni fondi klubni sotib olgani haqida xabar berilgandi.
France Football yilning eng yaxshi yosh o‘yinchisi nomiga da’vogarlarni e’lon qildi
France Football nashri 2021-yilning eng yaxshi yosh o‘yinchisi nomiga da’vogarlar ro‘yxatini e’lon qildi. Mukofotni 21 yoshgacha bo‘lgan futbolchilar qo‘lga kiritadi.
Raymon Kopa—2021 mukofotiga nomzodlar:
Meyson Grinvud (“Manchester Yunayted”, 20 yosh)
Bukayo Saka (“Arsenal”, 20 yosh)
Pedri (“Barselona”, 18 yosh)
Jeremi Doku (“Renn”, 19 yosh)
Rayan Gravenberx (“Ayaks”, 19 yosh)
Jamal Musiala (“Bavariya”, 18 yosh)
Florian Virts (“Bayer”, 18 yosh)
Jud Bellinghem (“Borussiya D”, 18 yosh)
Jovanni Reyna (“Borussiya D”, 18 yosh)
Nunu Mendesh (“PSJ”, 19 yosh).
Shuningdek, France Football dunyoning eng yaxshi darvozaboni — Lev Yashin mukofotiga nomzodlarni ham e’lon qildi.
Ro‘yxatdan Janluiji Donnarumma (“Milan” / “PSJ”), Manuel Noyer (“Bavariya”), Ederson (“Manchester Siti”), Yan Oblak (“Atletiko”), Samir Handanovich (“Inter”), Kasper Shmeyxel (“Lester”), Tibo Kurtua (“Real”), Eduard Mendi (“Chelsi”), Emiliano Martines (“Aston Villa”) va Keylor Navas (“PSJ”) joy oldi.
G‘oliblarni taqdirlash marosimi 29-noyabr kuni Parijda o‘lib o‘tadi. Eslatib o‘tamiz, Yashin “Oltin to‘p”ni qo‘lga kiritgan tarixdagi yagona darvozabon hisoblanadi. Bu 1963-yilda sodir bo‘lgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)