Дунё ва ўзбек спортига оид 8 октябрь кунининг энг муҳим хабарлари дайжести билан танишинг.
Ўзбекистон
Оғир атлетика бўйича ўсмирлар ўртасидаги жаҳон чемпионатида 3 та медал қўлга киритилдиСаудия Арабистонининг Жидда шаҳрида ўсмирлар ўртасида жаҳон чемпионати ўтказилмоқда.
Унда -55 кг вазн тоифасида иштирок этган Озода Ҳожиева 2 та медалга сазовор бўлди. Озода силтаб кўтариш баҳсларида илк уринишда — 92 кг, иккинчи уринишда — 95 кг тошни ўзига бўйсундирди. Сўнгги уринишда эса 98 килограммни кўтара олмади. Шундай бўлса-да, у силтаб кўтаришда учинчи ўринни банд этди.
Якуний ҳисобга кўра, 172 кг натижа қайд этган Озода иккинчи ўринни эгаллади ва Ўзбекистон терма жамоаси ҳисобига жаҳон чемпионатининг биринчи кумуш медалини қўшиб қўйди.
-73 кг вазн тоифасида иштирок этган Диёрбек Эрматов эса даст кўтариш машқида 132 кг натижа қайд этди ва ушбу йўналишда олтин медални қўлга киритди. Бу Ўзбекистон терма жамоаси учун мусобақадаги дастлабки олтин медал бўлди.
Шунингдек, Эрматов силтаб кўтариш баҳсларида ҳам ўз кучини синаб кўрди. Бироқ совринли поғоналардан жой ололмади — 5-ўрин.
Суперлиганинг сентябрь ойидаги энг яхшилари аниқланди
Ўзбекистон профессионал футбол лигаси (ПФЛ) сентябрь ойининг энг яхшиларини аниқлаш учун ўтказилган сўровнома натижаларини эълон қилди.
Унга кўра, «Насаф» бош мураббийи Рўзиқул Бердиев сентябрь ойининг энг яхши мураббийи деб топилди. Қарши клуби Бердиев қўл остида 3 ўйинда 3 ғалаба қайд этди. Тўплар нисбати эса 9:1 ни ташкил қилди.
Жамоа ҳужумчиси Ҳусайн Норчаев эса ойнинг энг яхши футболчиси деб топилди. Норчаев 3 ўйинда ўз номига 3 та гол ёздириб қўйди.
Жаҳон
Зиданни ортда қолдирган Бензема
«Реал» ҳужумчиси Карим Бензема Миллатлар Лигаси доирасида Бельгияга қарши ўйинда (3:2) гол урди.
Бу ҳужумчи учун «учранглилар» сафидаги 32-гол бўлди. Шу тариқа Бензема терма жамоадаги голлар сони бўйича собиқ ярим ҳимоячи Зинедин Зиданни (31 та гол) ортда қолдирди ва 6-ўринга кўтарилди. Тўпурарлар рўйхатини эса ҳамон ҳисобида 51 та гол бўлган Тьерри Анри бошқармоқда.
«Биллур оёқли» Азар яна жароҳат олди
Бельгия терма жамоаси ярим ҳимоячиси Эден Азар Францияга қарши ўйинда сон мушакларини шикастлаб олгани маълум бўлди.
Бироқ Marca унинг жароҳати жиддий эмаслиги ва текширувлар натижаси мушакларга ортиқча юклама тушганини кўрсатган деб ёзмоқда.
Қайд этиш керак, Азар 2021/22 йилги мавсумда бирорта ҳам ўйинда тўлиқ ҳаракат қилмади.
АПЛнинг сентябрь ойидаги энг яхшилари аниқланди
«Манчестер Юнайтед» ҳужумчиси Криштиану Роналду АПЛда ойнинг энг яхши футболчиси деб топилди.
Португалиялик сентябрь ойида Англия Премьер Лигасида 3 та ўйин ўтказиб, 3 та гол урди.
Шу тариқа Роналду Премьер Лигада 5 марта ойнинг энг яхши ўйинчиси бўлди. У охирги марта мазкур совринга 2008 йилда эга чиққанди.
«Арсенал» бош мураббийи Микель Артета эса ўтган ойнинг энг яхши мураббийи бўлди. Унинг қўл остидаги «канонирлар» сентябрь ойидаги 3 та ўйинда ҳам ғалаба қозонди.
Англиянинг «Ньюкасл» клубига янги бош мураббий тайинланиши мумкин
Саудияликлар томонидан сотиб олган «Ньюкасл» янги мураббий қидиришни бошлаб юборди. La Gazzetta dello Sport нашрига кўра клубнинг асосий мақсади Антонио Конте бўлиб турибди. Бироқ томонларнинг ҳали музокараларни бошламагани қўшимча қилинган.
Шунингдек, номзодлар қаторида Стивен Жеррард ва Фрэнк Лэмпард ҳам тилга олинмоқда.
Аввалроқ Саудия Арабистони фонди клубни сотиб олгани ҳақида хабар берилганди.
France Football йилнинг энг яхши ёш ўйинчиси номига даъвогарларни эълон қилди
France Football нашри 2021 йилнинг энг яхши ёш ўйинчиси номига даъвогарлар рўйхатини эълон қилди. Мукофотни 21 ёшгача бўлган футболчилар қўлга киритади.
Раймон Копа—2021 мукофотига номзодлар:
Мэйсон Гринвуд («Манчестер Юнайтед», 20 ёш)
Букайо Сака («Арсенал», 20 ёш)
Педри («Барселона», 18 ёш)
Жереми Доку («Ренн», 19 ёш)
Райан Гравенберх («Аякс», 19 ёш)
Жамал Мусиала («Бавария», 18 ёш)
Флориан Вирц («Байер», 18 ёш)
Жуд Беллингҳем («Боруссия Д», 18 ёш)
Жованни Рейна («Боруссия Д», 18 ёш)
Нуну Мендеш («ПСЖ», 19 ёш).
Шунингдек, France Football дунёнинг энг яхши дарвозабони — Лев Яшин мукофотига номзодларни ҳам эълон қилди.
Рўйхатдан Жанлуижи Доннарумма («Милан» / «ПСЖ»), Мануэль Нойер («Бавария»), Эдерсон («Манчестер Сити»), Ян Облак («Атлетико»), Самир Ҳанданович («Интер»), Каспер Шмейхель («Лестер»), Тибо Куртуа («Реал»), Эдуард Менди («Челси»), Эмилиано Мартинес («Астон Вилла») ва Кейлор Навас («ПСЖ») жой олди.
Ғолибларни тақдирлаш маросими 29 ноябрь куни Парижда ўлиб ўтади. Эслатиб ўтамиз, Яшин «Олтин тўп»ни қўлга киритган тарихдаги ягона дарвозабон ҳисобланади. Бу 1963 йилда содир бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)