“Bosh vazir va vazirlarning parlamentda axborot berishi shunchaki xo‘jako‘rsinga bo‘layotgan tadbirlar emas” — Sodiq Safoyev

O‘zbekistonda hukumat a’zolarining parlamentga axborot berishi odatiy tusga kirgan. Bu haqda Oliy Majlis Senati raisining birinchi o‘rinbosari Sodiq Safoyev 5-oktabr kuni Toshkentda bo‘lib o‘tgan “O‘zbekiston: besh yil ichidagi jadal islohotlar” nomli konferensiyada aytib o‘tdi, deya xabar bermoqda “Daryo” muxbiri.

Sodiq Safoyev anjumanda parlament eshituvlari haqida so‘z yuritar ekan, bu institut aholini, jamoatchilikni va nodavlat tashkilotlarni jalb etgan holda, vazirliklar bilan jiddiy muloqotga aylanib borayotganini ta’kidladi.

“Parlamentga hukumat a’zolari — bosh vazir, bosh vazirning o‘rinbosarlari, vazirlar kelib parlamentning talabi, so‘rovi bo‘yicha axborotlarni berishi odatiy masala bo‘lib qoldi. Ishontirib aytamanki, bu shunchaki xo‘jako‘rsinga bo‘layotgan tadbirlar emas. Har bir eshituv parlamentda chuqur tayyorlanadi”, — dedi Senat raisi o‘rinbosari.

Uning qo‘shimcha qilishicha, parlament nazorati faqat hukumat a’zolariga emas, balki viloyatlar hokimlarining va mahalliy hokimiyat organlarining hisobotini eshitish amaliyoti joriy etilgan.

Avvalroq Senat raisi hozirda parlament butunlay mustaqil ekani va hech kim parlamentga bosim o‘tkazmasligi haqida aytgan edi.

“Hozir biz butunlay mustaqilmiz. Hech kim bizga bosim o‘tkazmaydi. Hech kim ‘men aytganimdek qilasan, u masalani ko‘rib chiq yoki ko‘rib chiqma’ demaydi. Bunday so‘zlar hozir kun tartibidan chiqqan”, — deya ta’kidlagan parlament yuqori palatasi rahbari.

Uning so‘zlariga ko‘ra, Senat Prezident Administratsiyasi tomonidan ko‘rib chiqilgan yoki 150 nafar deputat tomonidan qabul qilingan qonunni tasdiqlamasligi mumkin — agar hujjat inson huquqlari talablariga javob bermasa, O‘zbekiston reytingiga salbiy ta’sir ko‘rsatsa yoki alohida idora manfaatlarni ifoda etsa. Masalan, 2020 yilda yuqori palata oltita qonunni rad etdi.