Ўзбекистонда ҳукумат аъзоларининг парламентга ахборот бериши одатий тусга кирган. Бу ҳақда Олий Мажлис Сенати раисининг биринчи ўринбосари Содиқ Сафоев 5 октябрь куни Тошкентда бўлиб ўтган «Ўзбекистон: беш йил ичидаги жадал ислоҳотлар» номли конференцияда айтиб ўтди, дея хабар бермоқда «Дарё» мухбири.
Содиқ Сафоев анжуманда парламент эшитувлари ҳақида сўз юритар экан, бу институт аҳолини, жамоатчиликни ва нодавлат ташкилотларни жалб этган ҳолда, вазирликлар билан жиддий мулоқотга айланиб бораётганини таъкидлади.
«Парламентга ҳукумат аъзолари — бош вазир, бош вазирнинг ўринбосарлари, вазирлар келиб парламентнинг талаби, сўрови бўйича ахборотларни бериши одатий масала бўлиб қолди. Ишонтириб айтаманки, бу шунчаки хўжакўрсинга бўлаётган тадбирлар эмас. Ҳар бир эшитув парламентда чуқур тайёрланади», — деди Сенат раиси ўринбосари.
Унинг қўшимча қилишича, парламент назорати фақат ҳукумат аъзоларига эмас, балки вилоятлар ҳокимларининг ва маҳаллий ҳокимият органларининг ҳисоботини эшитиш амалиёти жорий этилган.
Аввалроқ Сенат раиси ҳозирда парламент бутунлай мустақил экани ва ҳеч ким парламентга босим ўтказмаслиги ҳақида айтган эди.
«Ҳозир биз бутунлай мустақилмиз. Ҳеч ким бизга босим ўтказмайди. Ҳеч ким ‘мен айтганимдек қиласан, у масалани кўриб чиқ ёки кўриб чиқма’ демайди. Бундай сўзлар ҳозир кун тартибидан чиққан», — дея таъкидлаган парламент юқори палатаси раҳбари.
Унинг сўзларига кўра, Сенат Президент Администрацияси томонидан кўриб чиқилган ёки 150 нафар депутат томонидан қабул қилинган қонунни тасдиқламаслиги мумкин — агар ҳужжат инсон ҳуқуқлари талабларига жавоб бермаса, Ўзбекистон рейтингига салбий таъсир кўрсатса ёки алоҳида идора манфаатларни ифода этса. Масалан, 2020 йилда юқори палата олтита қонунни рад этди.
Мавзуга доир: «Ҳукумат ихчам бўлиши керак» — Русланбек Давлетов
Изоҳ (0)