“Afg‘oniston nafaqat xavf-xatar va tahdidlar, balki yangi imkoniyatlar manbasi hamdir” — Abdulaziz Komilov

Tashqi ishlar vaziri Abdulaziz Komilov “Yangi O‘zbekiston” gazetasiga bergan intervyusida Afg‘oniston bo‘yicha fikr bildirdi.

Uning so‘zlariga ko‘ra, Afg‘onistonda oddiy bo‘lmagan vaziyat yuzaga kelmoqda, ammo bu e’tibor qaratish lozim bo‘lgan yangi voqelikdir va undan yuz o‘girib bo‘lmaydi. TIV rahbarining aytishicha, Afg‘oniston hududidagi vaziyat hali-hamon mintaqadagi keskinlikning omili bo‘lib qolaveradi. Ushbu mamlakat hududining turli qismlarida ayrim terrorchilik guruhlari faoliyat ko‘rsatishda davom etayotgani ham bu fikrni tasdiqlaydi.

Abdulaziz Komilovning qayd etishicha, O‘zbekiston bu masalaga nafaqat Afg‘onistonning yakkalanib qolishini bartaraf etish, shuningdek, unga insonparvarlik yordami ko‘rsatilishini faollashtirish zarurligidan kelib chiqqan holda ham yondashmoqda.

“Biz bu mamlakat bilan chegarani ochdik va birinchi galda zarur bo‘lgan mahsulotlar — oziq-ovqat, neft mahsulotlari va elektr energiyasi yetkazib berishni qayta yo‘lga qo‘ydik. Shuningdek, rasmiy Toshkent Afg‘onistonning xorijiy banklarda muzlatib qo‘yilgan davlat aktivlarini qayta ochishni yoqlaydi hamda jahon hamjamiyatini Afg‘onistonda ijtimoiy, iqtisodiy va infratuzilma loyihalarini amalga oshirishni davom ettirishga da’vat etmoqda”, — degan u.

Aynan ana shu vazifalarni hal etish maqsadida 7-oktabr kuni O‘zbekiston rasmiy delegatsiyasi Kobulda bo‘lib, Afg‘oniston rahbariyati va Muvaqqat hukumat a’zolari bilan konstruktiv muloqot o‘tkazgandi.

Uning bildirishicha, Afg‘oniston Markaziy va Janubiy Osiyo o‘rtasidagi o‘zaro hamkorlik mustahkamlanishi uchun to‘siq emas, balki ko‘prik bo‘lmog‘i lozim. Bunga O‘zbekiston xalqaro hamkorlar bilan birgalikda bundan keyin ham ilgari surishni niyat qilayotgan transafg‘on transport-kommunikatsiya loyihalari ko‘maklashadi.