Axborot va ommaviy kommunikatsiyalar agentligi Chirchiq shahar hokimligi matbuot kotibi, hokimning axborot siyosati masalalari bo‘yicha maslahatchisi Faxriddin Qodirov bilan mehnat shartnomasi bekor qilinganini ma’lum qildi.
Ma’lum qilinishicha, u ijtimoiy tarmoqlardagi ommaviy munozara paytida davlat xizmatchisining maqomiga xos bo‘lmagan tarzda o‘z fikrini noto‘g‘ri shaklda bildirib, muloqot madaniyatining umumqabul qilingan me’yorlarini buzgan. U muloqot davomida qo‘pol so‘zlar ishlatgan, bu holat, o‘z navbatida, jamoatchilik e’tiroziga sabab bo‘lgan.
Sobiq matbuot kotib o‘z izohida “oddiy so‘zlar bilan yozilgan” chellenjdagi xabarini tushunmagan insonlarni “kaltafahm yoki o‘zini shunday tutadiganlar” deb atagan.
AOKA Faxriddin Qodirov bilan mehnat munosabatlarini davom ettirish mumkin emas, degan qarorga kelgan. Chunki u o‘z xatti-harakatlari bilan davlat xizmatchisining axloqiy me’yorlari va kodeksini buzgan, shuningdek, o‘z faoliyatida muloqot madaniyati me’yorlariga rioya qilmagan.
Chirchiq shahar hokimligi Ma’naviyat bo‘linmasi tashabbusi bilan o‘zbek tilida to‘g‘ri yozilgan, doimo zaruriy ehtiyojda bo‘lgan so‘z va nomlanishlarni kichik formatdagi flayerlarga chiqarib, eng qulay joylarga, xususan, jamoat joylari, do‘konlar, o‘quv yurtlari, jamoat transportlari va boshqa shu kabi aholi gavjum bo‘ladigan obyektlarda joylashtirish chelenjiga start berildi. Bu ijtimoiy tarmoqlarda keng bahs-munozaralarga sabab bo‘lgach, hokimlik holatga munosabat bildirdi. Unda ta’kidlanishicha, Chirchiq shahar hokimligi o‘zbek tilida gapirish targ‘ib qilingan flayerlarda hech bir tilni kamsitish maqsad qilinmagan.
Izoh (0)