Ахборот ва оммавий коммуникациялар агентлиги Чирчиқ шаҳар ҳокимлиги матбуот котиби, ҳокимнинг ахборот сиёсати масалалари бўйича маслаҳатчиси Фахриддин Қодиров билан меҳнат шартномаси бекор қилинганини маълум қилди.
Маълум қилинишича, у ижтимоий тармоқлардаги оммавий мунозара пайтида давлат хизматчисининг мақомига хос бўлмаган тарзда ўз фикрини нотўғри шаклда билдириб, мулоқот маданиятининг умумқабул қилинган меъёрларини бузган. У мулоқот давомида қўпол сўзлар ишлатган, бу ҳолат, ўз навбатида, жамоатчилик эътирозига сабаб бўлган.
Собиқ матбуот котиб ўз изоҳида «оддий сўзлар билан ёзилган» челленждаги хабарини тушунмаган инсонларни «калтафаҳм ёки ўзини шундай тутадиганлар» деб атаган.
АОКА Фахриддин Қодиров билан меҳнат муносабатларини давом эттириш мумкин эмас, деган қарорга келган. Чунки у ўз хатти-ҳаракатлари билан давлат хизматчисининг ахлоқий меъёрлари ва кодексини бузган, шунингдек, ўз фаолиятида мулоқот маданияти меъёрларига риоя қилмаган.
Чирчиқ шаҳар ҳокимлиги Маънавият бўлинмаси ташаббуси билан ўзбек тилида тўғри ёзилган, доимо зарурий эҳтиёжда бўлган сўз ва номланишларни кичик форматдаги флаерларга чиқариб, энг қулай жойларга, хусусан, жамоат жойлари, дўконлар, ўқув юртлари, жамоат транспортлари ва бошқа шу каби аҳоли гавжум бўладиган объектларда жойлаштириш челенжига старт берилди. Бу ижтимоий тармоқларда кенг баҳс-мунозараларга сабаб бўлгач, ҳокимлик ҳолатга муносабат билдирди. Унда таъкидланишича, Чирчиқ шаҳар ҳокимлиги ўзбек тилида гапириш тарғиб қилинган флаерларда ҳеч бир тилни камситиш мақсад қилинмаган.
Изоҳ (0)