Ijtimoiy tarmoqlarda O‘zbekistonda Ai-91 benzinining narxi qimmatlashgani va sifati pastligi haqida turli xabarlar paydo bo‘la boshladi. Bu masalaga O‘zLiDePning Oliy Majlis Qonunchilik palatasidagi deputati Rasul Kusherbayev ham o‘z Telegram kanalida post qoldirdi.
Ayni paytda “O‘zbeknefgaz” AJ tasarrufidagi avtomobillarga yoqilg‘i quyish shoxobchalar (AYoQSh)da ushbu rusumdagi benzin sotilmayotgan bo‘lsada, boshqa rusumdagi benzinlar narxi va sifatini o‘rganish maqsadida xalq vakillari, jurnalist va blogerlar uchun AYoQShlarga press-tur tashkil etildi.
Oliy Majlis Qonunchilik palatasining deputati Rasul Kusherbayev, jurnalist va blogerlar Xurshid Daliyev, Nurbek Alimov, Saidali Muxtoraliyev, Human.uz bosh muharriri Muslim Mirzajonovlar tomonidan Toshkent shahridagi turli AYoQShlarda jamoatchilik nazorati bo‘yicha o‘rganishlar olib borildi. Shoxobchalardagi benzin sifatini aniqlash uchun shu yerning o‘zida laboratoriya tekshiruvlari o‘tkazildi.
“Bugun kech bo‘lishiga qaramay, benzin quyish shoxobchalarida benzin narxi va sifati bilan qiziqdik. ‘O‘zbekneftgaz’ tizimidagi shoxobchalarda benzinlar sifati bo‘yicha laboratoriya tekshiruvida Ai-80 markasi 85, Ai-92 markasi esa 94 markasida bo‘lib chiqdi. Sifatga gap yo‘q. Ai-80 marka 5900 so‘m, Ai 92 marka esa 7900 so‘mdan sotilmoqda. Ai-91 benzini bir yildan buyon sotuvda yo‘q ekan. Ushbu markadagi benzin asosan xususiy benzin shoxobchalarida qolibdi.
Yuqoridagi narxlar faqat “O‘zbekneftgaz” tizimidagi benzin quyish shoxobchalarida amal qilmoqda. Qolgan xususiy benzin sotuvchi tashkilotlarda esa narxlar turlicha”, — deydi press-tur ishtirokchisi deputat Rasul Kusherbayev.
Avvalom bor shuni ma’lum qilamizki, “O‘zbekneftgaz” AJ boshqaruvi raisi Mehriddin Abdullayev topshirig‘i bilan aksiyadorlik jamiyati tasarrufidagi neftni qayta ishlash korxonalaridagi markaziy sinov laboratoriyalarida avtomatlashtirilgan tizim joriy qilingan. Ushbu tizim o‘tkazilayotgan tahlillar natijalarini umumiy bazada jamlash, mahsulotlar sifatini operativ nazorat qilishda muhim omil hisoblanadi.
Shuningdek, markaziy sinov laboratoriyalarda tahlillar o‘tkazishning avtomatlashtirilgan tizimining joriy qilinishi natijasida, sifat nazorati bilan birga o‘lchashlar aniqligi oshirilishiga erishildi. Ushbu laboratoriyalarda neft mahsulotlarining tarkibi tahlil qilinib, sifatini nazorat qilish doimiy ravishda belgilangan talablar asosida olib boriladi.
Bundan tashqari, “O‘zbekneftgaz” AJ tasarrufidagi AYoQShlarning o‘zida ham benzin sifatini laboratoriya tekshiruvidan o‘tkazish imkoniyati yaratilgan. Iste’molchi sifatida har qanday fuqaro o‘zi xarid qilayotgan benzin sifatini laboratoriya tekshiruvidan o‘tkazishni talab qilish huquqiga ega.
Ma’lumot uchun, O‘zbekistonda avtobenzin narxlarini hukumat qarorlari bilan belgilash amaliyotidan voz kechilgan. Buxoro neftni qayta ishlash zavodi tomonidan avtomobil benzini va dizel yoqilg‘isi birja savdolariga jahon birjalaridagi Brent neft kotirovkalariga bog‘lab qo‘ygan holda shakllangan boshlang‘ich narxlarda qo‘yib borilmoqda.
Bugungi kunda Brent markali neftning jahon birjalaridagi kotirovka narxlari 1 barreli uchun 80—81 AQSh dollarini tashkil etgan bir vaqtda, “O‘zbekneftgaz” AJ Ai-80 avtobenzinining narxini mahsulotni ichki bozorga katta hajmda realizatsiya (intervensiya) qilish hisobiga bir maromda ushlab turilmoqda.
“O‘zbekneftgaz” AJ matbuot xizmati
Izoh (0)