Ijtimoiy tarmoqlarda Bobur G‘aniyev nomi bilan tanilgan bloger YPX xodimini haqorat qilgani uchun qo‘lga olinib, 15 sutka ma’muriy qamoq jazosi tayinlangandi. Toshkent shahar sudlari matbuot xizmatining ma’lum qilishicha, blogerning advokati tomonidan keltirilgan apellyatsiya shikoyati qanoatlantirilmadi.
Eslatib o‘tamiz, internetda YPX xodimlarini tanqid qilgan videolari bilan tanilgan bloger Bobur G‘aniyev 30-sentabr kuni ushlangandi. Shu kuni soat 23:30 larda Uchtepa tumani “Farhod” bozori ro‘parasida o‘tkazilayotgan “Xavfsiz poytaxt” profilaktik tadbiri davomida Toshkent shahar IIBB YHXB YPX inspektorlari tomonidan bloger ketayotgan Epica to‘xtatilgan.
Mashina haydovchisi Abror Kozubayevning hujjatlari tekshirilgan. Epica’da yo‘lovchi sifatida o‘tirgan Bobur G‘aniyev YPX inspektorlarini haqorat qilib, janjal ko‘targan. IIO xodimlarining qonuniy talablariga bo‘ysunmasdan jamoat tartibini buzgan. Shundan so‘ng transport vositasining haydovchisi, yo‘lovchilari — Bobur G‘aniyev va Obid Salimov Uchtepa tumani IIO FMBga olib borilgan.
Holat yuzasidan hujjatlarni rasmiylashtirish va tekshiruv o‘tkazish jarayonida Bobur G‘aniyevning shaxsiy uyali telefon apparatida pornografik mazmundagi, qonunda taqiqlangan videomateriallar va fotosuratlar borligi aniqlangan. Blogerning o‘zi ham qonunbuzarlik sodir etganini tan olgan.
Yuz bergan holat bo‘yicha to‘plangan hujjatlar Jinoyat ishlari bo‘yicha Uchtepa tuman sudiga taqdim etilgan va Bobur G‘aniyevga Ma’muriy javobgarlik to‘g‘risidagi kodeksning 41-moddasida ko‘rsatilgan huquqbuzarlikni sodir etgani uchun (haqorat qilish) BHMning 20 barobari (5,4 million so‘m), 194-modda (ichki ishlar organlari xodimining qonuniy talablarini bajarmaslik) bo‘yicha BHMning 1 baravari (270 ming so‘m), 195-modda (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) bo‘yicha esa 15 sutka ma’muriy qamoq jazosi belgilangan. Bundan tashqari, Epica haydovchisi va yana bir yo‘lovchiga ham tegishlicha jazo tayinlangan.
Shundan so‘ng, blogerning advokati F.Tolibov tomonidan sud qaroriga nisbatan apellyatsiya shikoyati keltirilgan. Ammo 6-oktabr kuni Toshkent shahar sudi jinoyat ishlari bo‘yicha sudlov hay’ati apellyatsiya instansiyasi Bobur G‘aniyevga nisbatan jinoyat ishlari bo‘yicha Uchtepa tuman sudining qarorini o‘zgarishsiz qoldirgan.
Izoh (0)