Андижонда фуқарога 200 минг доллар имтиёзли кредит олиб беришни ваъда қилиб, ундан пул талаб қилган шахс ушланди. Бу ҳақда Бош прокуратура ҳузуридаги департамент хабар берди.
Маълум қилинишича, Бош прокуратура ҳузуридаги департамент ҳамда ДХХнинг Андижон вилояти бошқармалари томонидан тезкор тадбир ўтказилган. Тадбир давомида О.К. исмли шахс фуқаро О.га ўзини гўёки Испания давлатида фаолият юритувчи банкнинг Ўзбекистондаги вакили сифатида таништиргани аниқланган. О.К. ушбу фуқаро тадбиркорлик фаолияти учун мазкур банкдан 200 минг доллар имтиёзли кредит ажратиб бериши эвазига 6,3 минг доллар олган вақтида ашёвий далиллар билан ушланган.
Шунингдек, терговга қадар текширувда О.К. муқаддам фуқаролар К. ва Қ.нинг ҳам шу йўсинда 21,5 минг долларни қўлга киритгани маълум бўлган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Марғилонда бирга тадбиркорлик қилишни айтиб, бегона аёлнинг 200 миллион сўмини қўлга киритган шахсга жиноят иши қўзғатилгани, Хоразмда ўқишга киритиб қўйишни ваъда бериб, фуқароларнинг 700 миллион сўмга яқин маблағини ўзлаштирган шахсларга суд ҳукми ўқилгани тўғрисида хабар берилганди.
Изоҳ (0)