Qashqdaryo viloyati Xalq ta’limi boshqarmasi ijtimoiy tarmoqlarda Shahrisabzdagi 58-maktabda o‘quvchilar poli chirib ketgan sportzalda shug‘ullanayotgani yuzasidan tarqalgan xabarlarga munosabat bildirdi.
“Kun.uz”ning Qashqadaryo viloyatiga oid yangiliklarni yoritib boruvchi Telegram kanalida Shahrisabzdagi maktablardan birida o‘quvchilar poli chirib ketgan sportzalda shug‘ullanayotgani haqida suratlar e’lon qilindi.
Qashqadaryo XTBning ma’lum qilishicha, mazkur holat viloyat xalq ta’limi boshqarmasi axborot xizmati rahbari va tegishli mas’ullar ishtirokida o‘rganilmoqda.
Ma’lumotlarga ko‘ra, Shahrisabz tumani xalq ta’limi bo‘limiga qarashli 58-umumiy o‘rta ta’lim maktabi “G‘ilon” MFYga qarashli G‘ilon qishlog‘ida joylashgan. Maktab 1967-yil qurilgan va 2014-yilda 200 o‘rinli yangi o‘quv binosi barpo etilgan. Mavjud 2 ta 240 o‘rinli o‘quv binolari mukammal ta’mirlangan.
2019-yilda maktab filialiga Investitsiya davlat dasturi asosida 96 o‘rinli o‘quv binosi qurilgan. Jami quvvati bugungi kunda 776 o‘quvchi o‘rinli, o‘quvchilar soni 557 nafar, navbatlilik koeffitsiyent 0,7 foiz va maktabning umumiy yer maydoni 1,75 gektarni tashkil etadi.
“Maktabning 12x24 metr o‘lchamdagi sport zali 2007-yil qurilgan. Maktab tog‘li hududda joylashgani, yerosti suvlari yer yuzasiga yaqinligi, namgarchilik yuqoriligi natijasida sport zalining pol qismi juda tez vaqtda yaroqsiz holatga kelgan”, — deyiladi munosabatda.
Ta’kidlanishicha, 2022-yil “Mahalliy budjet” hisobidan maktab sport zalining pol qismi yangidan ta’mirlash rejalashtirilgan.
Izoh (0)