DXXning Toshkent viloyati bo‘yicha boshqarmasi va iqtisodiy jinoyatlarga qarshi kurashish departamentining hududiy boshqarmasi xodimlari tomonidan o‘tkazilgan tezkor tadbirda pullarni qalbakilashtirish bilan shug‘ullangan shaxslar qo‘lga olindi. Bu haqda DXX matbuot xizmati xabar berdi.
Ma’lum qilinishicha, Olmaliq shahrida yashovchi, 33 yoshli fuqaro S.Sh. qalbaki 100 ming so‘mlik kupyuradan iborat jami 50 million so‘mni 5 million so‘mga sotayotgan vaqtida ashyoviy dalillar bilan qo‘lga olingan.
Shuningdek, uning yashash manzilida 2 million 600 ming so‘m miqdoridagi qalbaki 100 ming so‘mlik kupyuralar borligi aniqlanib, protsessual tartibda rasmiylashtirib olingan.
Dastlabki surishtiruv harakatlari davomida ushbu qalbaki pullar Olmaliq shahrida yashovchi, 22 yoshli U.M. va Piskent tumanida istiqomat qiluvchi 20 yoshli M.S. tomonidan kompyuter va rangli printer yordamida tayyorlangani aniqlanib, ular ham hibsga olingan.
Shuningdek, ushlangunga qadar ular jami 210 million so‘m miqdoridagi qalbaki 100 ming so‘mlik kupyuralarni muomalaga chiqarib yuborgani aniqlangan.
Hozirda mazkur shaxslarga nisbatan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
Mavzuga doir:
- O‘zbekistonda 1 mln dollarlik yaxlit kupyura sotayotgan shaxs ushlandi
- Toshkent viloyatida qalbaki 1100 dollarni 500 dollarga sotmoqchi bo‘lgan shaxslar ushlandi
- Zangiotada qalbaki 5 ming dollarni muomalaga kiritmoqchi bo‘lgan shaxslar ushlandi
- Toshkentda qalbaki 5,5 ming yevroni sotmoqchi bo‘lgan shaxs qo‘lga olindi
Izoh (0)