Дунё ва ўзбек спортига оид 5 октябрь кунининг энг муҳим хабарлари дайжести билан танишинг.
Ўзбекистон
Футбол бўйича Ўзбекистон Суперлигасининг 22-тур ўйинлари бошланиш вақтлари маълум бўлди.Профессионал футбол лигасининг (ПФЛ) маълум қилишича, 22-турдан ўрин олган беллашувлар 15—17 октябрь кунлари бўлиб ўтади.
Суперлига
22-тур ўйинлари
15 октябрь
18:30 «Насаф» — «Металлург»
18:30 «ОКМК» — «Машъал»
16 октябрь
16:15 «Пахтакор» — «Қизилқум»
17:00 «Турон» — «Сурхон»
18:30 «Сўғдиёна» — «Қўқон-1912»
17 октябрь
17:00 «Навбаҳор» — «Бунёдкор»
17:00 «Локомотив» — «Андижон».
«Реал» Мбаппе трансферини январда ҳал қилмоқчи
«Реал Мадрид» президенти Флорентино Перес клуб қишки трансфер ойнасида «ПСЖ» ҳужумчиси Килиан Мбаппени сотиб олишга ҳаракат қилишини маълум қилди.
«Умид қиламанки, 1 январгача ҳамма нарса ҳал бўлади», — дейди Перес.
Қайд этиш керак, Мадрид клуби ўтган ёзда ҳам Мбаппени сотиб олмоқчи эди, бироқ «ПСЖ» «қироллик клуби»нинг ҳар иккала трансфер таклифига рад жавобини берганди.
Франциялик футболчи ушбу ҳафтада берган интервьюсида «Реал»га кетмоқчи эканлигини тан олди, бироқ келажаги қандай бўлишини билмаслигини таъкидлади.
Левандовски «Бавария»да қолмоқчи
Роберт Левандовски «Бавария» билан шартномасини 2025 йилгача узайтирмоқчи, деб хабар бермоқда Билд журналисти Кристиан Фалк.
Польшалик ҳужумчининг Мюнхен клуби билан амалдаги шартномаси 2023 йилда ўз ниҳоясига етади. У 2014 йилдан бери «Бавария» шарафини ҳимоя қилиб келади.
Эронда икки йил деганда илк марта аёлларнинг стадионларга киришига рухсат этилади
Эрон терма жамоасининг ЖЧ—2022 саралаши доирасида Теҳронда бўлиб ўтадиган Жанубий Кореяга қарши ўйинига икки йил ичида илк марта аёллар киритилади. Бу ҳақда Yahoo хабар берди.
Эронлик аёллар охирги марта 2019 йилнинг октябрида Камбоджага қарши ўйинда (14:0) мамлакат терма жамоасини стадиондан туриб қўллаб-қувватлаганди.
Маълумот учун, Эронда 1979 йилги инқилобдан кейин аёлларнинг стадионларга кириши тақиқланган. Бунга расмий сабаб сифатида уларни стадиондаги эркакларнинг одобсиз хатти-ҳаракатларидан ҳимоя қилиш истаги бўлган.
Трансферлардан 115 миллион евро қарзи бор «Барселона»
«Барселона»нинг трансферлардан 115 миллион евро қарзи борлиги маълум бўлди. Marca’нинг ёзишича, каталон клуби аввалги трансферларга сезиларли даражада кўп пул сарфлашига тўғри келади.
Хусусан, каталонияликлар Миралем Пьянич трансфери учун «Ювентус»га 39 млн евро тўлаши лозим. «Аякс»дан эса Френки де Йонг (32 млн) ва Сержиньо Дест (16 млн) учун умумий ҳисобда 48 млн қарздор. Бундан ташқари, клуб Филиппе Коутиньо хариди учун ҳам «Ливерпуль»га 13 млн евро тўлаши керак.
Кучли бешлик чемпионатларининг энг қиммат таркибга эга клублари рейтинги эълон қилинди
Халқаро спорт тадқиқотлари маркази (CIES) Европанинг топ-5 лигаларининг энг қиммат таркибга эга клублари рўйхатини эълон қилди.
Иш жараёни ташкилот томонидан яратилган махсус алгоритм ёрдамида амалга оширилган. Ҳисоблашда футболчиларнинг трансфер нархи 1 октябрь ҳолатига кўра олинган. Шу билан бирга, ижарада бўлган футболчилар ҳисобга олинмаган.
Ҳисоб-китобларга кўра, рўйхатнинг биринчи учлигини АПЛ клублари эгаллади: «Манчестер Сити», «Манчестер Юнайтед» ва «Челси».
Кучли 20 талик қуйидагича кўриниш олди:
1. «Манчестер Сити» (Англия) – 1,280 млрд евро;
2. «Манчестер Юнайтед» (Англия) – 1,214 млрд евро;
3. «Челси» (Англия) – 946 млн евро;
4. «Барселона» (Испания) – 896 млн евро;
5. «Бавария» (Германия) – 890 млн евро;
6. «Ливерпуль» (Англия) – 868 млн евро;
7. «Реал» (Испания) – 846 млн евро;
8. «ПСЖ» (Франция) – 808 млн евро;
9. «Боруссия Д» (Германия) – 687 млн евро;
10. «Атлетико» (Испания) – 662 млн евро;
11. «Ювентус» (Италия) – 618 млн евро;
12. «Лейпциг» (Германия) – 590 млн евро;
13. «Тоттенҳэм» (Англия) – 586 млн евро;
14. «Арсенал» (Англия) – 563 млн евро;
15. «Байер» (Германия) – 537 млн евро;
16. «Лестер» (Англия) – 480 млн евро;
17. «Интер» (Италия) – 469 млн евро;
18. «Милан» (Италия) – 434 млн евро;
19. «Севилья» (Испания) – 425 млн евро;
20. «Рома» (Италия) – 415 млн евро.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)