Shavkat Mirziyoyev taklifiga binoan Turkmaniston prezidenti Gurbanguli Berdimuhamedov 4-oktabr kuni rasmiy tashrif bilan O‘zbekistonga kelgani to‘g‘risida xabar berilgandi. 5-oktabr kuni Ko‘ksaroy qarorgohida Turkmaniston prezidentini rasmiy kutib olish marosimi va prezidentlar o‘rtasidagi tor doiradagi uchrashuvdan so‘ng ikki mamlakat rasmiy delegatsiyalari ishtirokidagi muzokaralar kengaytirilgan tarkibda davom etdi.
Prezident matbuot xizmatining xabar berishicha, uchrashuvda birgalikdagi sa’y-harakatlar tufayli birodar mamlakatlarimiz o‘rtasidagi munosabatlar sifat jihatidan yangi, strategik sheriklik darajasiga ko‘tarilgani alohida ta’kidlandi.
Davlat rahbarlari keyingi yillardagi o‘zaro savdo sur’atini mamnuniyat bilan qayd etib, tovar ayirboshlash hajmini yanada ko‘paytirish uchun mavjud barcha resurs va imkoniyatlarni ishga solishga kelishib oldi. Savdo uylarini tashkil etish va uchinchi mamlakatlar bozorlariga chiqishni nazarda tutgan holda o‘zaro yetkazib berilayotgan mahsulotlarning nomenklaturasini kengaytirish va diversifikatsiya qilish — bu boradagi yo‘nalishlardan biridir.
Uchrashuvda, shuningdek, turli tarmoqlarda sanoat kooperatsiyasini rivojlantirish, shu jumladan avtomobillar yig‘ish, kimyoviy mahsulotlar, elektr texnikasi va maishiy texnika, qurilish materiallarini ishlab chiqarish, paxta tolasi va meva-sabzavot mahsulotlarini chuqur qayta ishlash, logistika infratuzilmasini yaratish ham ikki tomonlama hamkorlikning istiqbolli yo‘nalishlari sifatida belgilab olindi.
O‘zbekiston Prezidenti tegishli “yo‘l xaritasi”ni tayyorlashni taklif qildi.
Tomonlar transport sohasida va tranzit yo‘laklarini rivojlantirish bo‘yicha hamkorlikni faollashtirishga kelishib oldilar. Ashxobod bitimini birgalikda ilgari surish hamda Turkmanboshi dengiz portining noyob imkoniyatlaridan foydalanishni kengaytirish muhim ekani ta’kidlandi.
Bu boradagi o‘zaro muvofiqlashtirilgan qo‘shma sa’y-harakatlar yuk tashishlar hajmini oshirish hamda tranzit salohiyatini ro‘yobga chiqarish uchun qulay sharoitlar yaratadi.
Ikki mamlakat hududlaridagi imkoniyatlarni yanada to‘liq ishga solish muhim ekani qayd etildi. Hamkorlikning yangi mexanizmi — hududlararo forum o‘tkazishni yo‘lga qo‘yish yuzasidan kelishuvga erishildi.
Suv xo‘jaligi sohasidagi hamkorlik yuksak baholandi. Suv xo‘jaligi masalalari bo‘yicha hukumatlararo komissiyaning birinchi yig‘ilishi muvaffaqiyatli o‘tkazilgani olqishlandi. Tuyamo‘yin suv omborining Sulton Sanjar to‘g‘onini rekonstruksiya qilish loyihasini amalga oshirish boshlangani mamnuniyat bilan qayd etildi.
Madaniy-gumanitar sohadagi hamkorlik masalalari ham muhokama qilindi.
Shavkat Mirziyoyev O‘zbekistonda turkman millatiga mansub 200 ming nafardan ziyod fuqaro istiqomat qilayotganini, ular o‘z tili, madaniyati, an’ana va urf-odatlarini rivojlantirishlari uchun bundan buyon ham barcha sharoitlarni yaratilishini ta’kidladi. “Ishonchim komil, hurmatli Gurbanguli Myalikguliyevich tashabbusi bilan Ashxobodda barpo etilayotgan ‘Toshkent’ bog‘i xalqlarimiz do‘stligining navbatdagi yangi ramzi bo‘ladi”, — deb qayd etgan Prezident.
Muzokaralarda Afg‘onistonda tinchlik va barqarorlik butun Markaziy Osiyo mintaqasida barqaror taraqqiyot garovi ekani ta’kidlandi.
Prezidentlar xalqaro maydonda, shu jumladan, BMT, MDH, Yevropada xavfsizlik va hamkorlik tashkiloti, Iqtisodiy hamkorlik tashkiloti, Islom hamkorlik tashkiloti, Turkiy tilli davlatlar hamkorligi tashkiloti va boshqa xalqaro tuzilmalar doirasida yaqin muloqotni davom ettirish va tashabbuslarni birgalikda ilgari surishga kelishib oldi.
Muzokaralar yakunida prezidentlar ikki tomonlama hamkorlik bo‘yicha hukumatlararo komissiya hamraislariga erishilgan kelishuvlarni amalga oshirishning aniq mexanizmlarini o‘z ichiga olgan “yo‘l xaritasi”ni tayyorlashga topshiriq berdi.
Izoh (0)