Toshkent shahar Xalq ta’limi boshqarmasi poytaxtning Yashnobod tumanidagi maktablarning biriga ro‘mol o‘rab kelgan o‘quvchi qizlar kiritilmagani to‘g‘risida tarqalgan xabarlarga rasmiy munosabat bildirdi.
Facebook ijtimoiy tarmog‘ida Yashnobod tumanidagi 307-sonli ixtisoslashtirilgan davlat umumta’lim maktabi direktori 4 nafar o‘quvchi qizni ro‘moli uchun maktabdan haydab yuborgani, ertaga ro‘molsiz, kalta yubkada kelsa, maktabga kirgizishini aytgani to‘g‘risida xabarlar tarqaldi.
Poytaxt XVBning ma’lum qilishicha, mazkur holat bo‘yicha Yashnobod tumani xalq ta’limi bo‘limi ishchi guruhi tomonidan o‘rganish olib borilgan va yakunda bu xabar o‘z isbotini topmagan.
“Mazkur umumta’lim muassasasida o‘quvchi-qizlar Xalq ta’limi vazirligi tomonidan qo‘yilgan talablarga mos holda kiyinish madaniyatiga rioya qilishmoqda. Bundan tashqari, maktab hududida kiyinish madaniyatiga rioya qilmaydigan qizlar bilan doimiy ravishda maktab ma’muriyati, jumladan, pedagoglar tomonidan, albatta, madaniyat va odob chegarasidan chiqmagan holda suhbatlar amalga oshirilmoqda”, — deyiladi munosabatda.
Eslatib o‘tamiz, 4-sentabr kuni xalq ta’limi vaziri boshchiligida 2021/2022-o‘quv yili oldidan umumta’lim maktablari direktorlari, o‘qituvchilar va ota-onalar ishtirokida o‘tkazilgan ochiq muloqotda Sherzod Shermatov o‘quvchi qizlarning maktabga ro‘mol o‘rab kelishiga ruxsat berilishini ma’lum qilgandi.
Izoh (0)