O‘zbekiston Prezidenti Shavkat Mirziyoyevning taklifiga binoan Turkmaniston prezidenti Gurbanguli Berdimuhamedov 4-oktabr kuni rasmiy tashrif bilan O‘zbekistonga kelgani to‘g‘risida xabar berilgandi. Prezident matbuot xizmatining ma’lum qilishicha, 5-oktabr kuni Ko‘ksaroy qarorgohida Turkmaniston prezidentini rasmiy kutib olish marosimi bo‘lib o‘tgan.
Ma’lum qilinishicha, marosimdan so‘ng Prezidentlar Shavkat Mirziyoyev va Gurbanguli Berdimuhamedov tor doirada uchrashuv o‘tkazgan.
Uchrashuv avvalida Shavkat Mirziyoyev Turkmaniston yetakchisini samimiy qutlab, 27-sentabr kuni nishonlangan bayram – ushbu mamlakat mustaqilligining 30 yilligi bilan yana bir bor muborakbod etgan hamda birodar turkman xalqiga tinchlik-osoyishtalik va farovonlik tilagan.
“Har bir uchrashuvimiz tarixiy ahamiyatga ega muhim voqeadir. Barcha erishilgan kelishuvlar hayotga tatbiq etildi va xalqlarimizga xizmat qilmoqda. Bugun sherikligimizning dolzarb masalalarini batafsil muhokama qilish va uzoq muddatli istiqbolga yangi ‘o‘sish nuqtalarini’ belgilab olish uchun yaxshi imkoniyat bo‘ladi. Sizning tashrifingiz mintaqaviy va xalqaro maydonda hamkorlikni kengaytirishga xizmat qiladi, — deya ta’kidlagan Shavkat Mirziyoyev.
Turkmaniston prezidenti mehmondo‘stlik uchun minnatdorlik bildirib, ikki davlat o‘rtasidagi munosabatlar yuksak darajaga yetganini qayd etgan.
“O‘zbekiston – bizning yaqin qo‘shnimiz va strategik sherigimiz. Keyingi yillarda hamkorlik jadal rivojlanib bormoqda. Bu siyosatda ham, savdo-iqtisodiy sohada ham, madaniy-gumanitar sohada ham o‘z aksini topmoqda. Mintaqaviy va xalqaro masalalarda bir-birimizni qo‘llab-quvvatlayapmiz. Chunki maqsadlarimiz hamohang”, — deydi Gurbanguli Berdimuhamedov.
Qayd etilishicha, uchrashuvda davlat rahbarlari ko‘p asrlik do‘stlik, yaxshi qo‘shnichilik, strategik sheriklik, o‘zaro ishonch va qo‘llab-quvvatlash tamoyillariga asoslangan ikki tomonlama munosabatlarning bugungi darajasini yuksak baholagan. Yetakchilar O‘zbekiston—Turkmaniston ko‘p qirrali hamkorligida mavjud masalalarning butun doirasini muhokama qilib, konstruktiv siyosiy muloqotni mustahkamlash, savdo-iqtisodiy va investitsiyaviy sheriklikni kengaytirish, madaniy-gumanitar aloqalarni rivojlantirishga alohida e’tibor qaratgan.
Ma’lumot uchun, keyingi to‘rt yilda o‘zaro savdo hajmi uch barobarga ko‘payib, 400 million dollardan oshgan. 2021-yil boshidan tovar ayirboshlash yana 25 foizga ortgan.
2021-yil 14-sentabr kuni bo‘lib o‘tgan Ikki tomonlama hamkorlik bo‘yicha hukumatlararo komissiyaning 16-yig‘ilishi hamda 4-oktabr kuni Toshkentda bo‘lib o‘tgan O‘zbekiston—Turkmaniston iqtisodiy forumi natijalari o‘zaro manfaatli savdo-iqtisodiy aloqalarni yanada kengaytirishga xizmat qilishi ta’kidlangan.
“Ikki mamlakatning, ayniqsa, chegaradosh hududlari o‘rtasidagi hamkorlikning salohiyati ulkan ekani alohida qayd etilgan. Turkmanistonning Lebap va Doshog‘uz viloyatlari rahbarlarining 2021-yil 22-sentabr kuni O‘zbekistonning Buxoro va Xorazm viloyatlariga do‘stlik tashriflari bunga misoldir. Prezidentlar bunday muntazam uchrashuvlar ikki mamlakat va xalq o‘rtasida o‘zaro anglashuvni mustahkamlashga xizmat qilishini ta’kidladilar”, — deyiladi xabarda.
Suv xo‘jaligi sohasidagi hamkorlikka yuqori baho berilgan. Tomonlar 13-sentabr kuni Toshkentda Suv xo‘jaligi masalalari bo‘yicha hukumatlararo komissiyaning birinchi yig‘ilishi muvaffaqiyatli o‘tkazilganini mamnuniyat bilan qayd etgan.
Mintaqa va xalqaro kun tartibi yuzasidan fikr almashilgan. Markaziy Osiyo davlatlari rahbarlarining Maslahat uchrashuvlarini muntazam o‘tkazish hamda 2021-yil 6-avgust kuni Avazada o‘tkazilgan uchrashuvda erishilgan kelishuvlarni amalga oshirish muhim ekani ta’kidlangan.
Eslatib o‘tamiz, Turkmaniston prezidenti so‘nggi marta O‘zbekistonga 2019-yil noyabr oyida tashrif buyurgan. 2021-yilning avgust oyida ikki davlat rahbari Kaspiy dengizi sohilidagi Avaza milliy sayyohlik zonasida Markaziy Osiyo davlatlari prezidentlarining uchinchi Maslahat uchrashuvi doirasida uchrashgandi.
Izoh (0)