Respublika Gidrometeorologiya markazi O‘zbekistonda oktabr oyida qanday ob-havo bo‘lishi haqida ma’lumot berdi.
Qayd etilishicha. 2021-yilning oktabr oyi keskin sovuqdan boshlandi. Mamlakatga Rossiyaning Yevropa hududining markaziy qismidan kelgan sovuq havo massasi havo haroratini birdaniga 10-12 darajaga pasaytirdi. Kechalari harorat 3-6 darajagacha pasaydi, Qoraqalpog‘istonning shimoliy hududlarida esa birinchi kuzgi sovuq kuzatildi. Kunduz kungi harorat 15-18 darajadan oshmadi.
Shu haftaning oxirigacha Rossiyaning Yevropa qismi ustida joylashgan keng ko‘lamli sovuq antitsiklonning janubiy chekkasi ta’siri saqlanib turadi. O‘zbekistonda past harorat fonida harorat biroz o‘zgarib turishi kutilmoqda. Bulutli va yog‘ingarchilikli ob-havoda kunduz kunlari harorat 13-16 darajagacha pasayadi, havo ochiq bo‘lganda esa 19-22 darajagacha ko‘tariladi. Kechalari harorat 5-10 daraja iliq atrofida bo‘ladi. Birinchi o‘n kunlikning oxirigacha o‘rtacha havo harorati ushbu davr uchun me’yoriy qiymatlardan 2-4 darajaga past bo‘ladi.
5-oktabrda O‘zbekistonning shimolida, 6 va 8—9-oktabrda respublikaning markaziy hududlarida va Farg‘ona vodiysida yomg‘ir yog‘ishi kutilmoqda. 6—9-oktabrda tog‘ oldi va tog‘li hududlarda jadalligi kuchli bo‘lgan yomg‘ir yog‘adi. Baland tog‘larda yomg‘ir qorga aylanishi ehtimoldan holi emas.
Ushbu kunlarda tezligi birozdan o‘rtachagacha bo‘lgan, asosan, sharqiy yo‘nalishdagi shamol esadi, shimolda va cho‘l hududlarida 15-20 metr/sekundgacha kuchayadi.
So‘ng, oktabr oyining oxirigacha harorat o‘zgarib turishi kutilmoqda — eng issiq kunlarda harorat 22-27 daraja iliqqacha ko‘tariladi, eng sovuq kunlarda harorat 13-18 darajagacha pasayadi. Kechalari harorat 5-10 daraja iliqdan 0-5 daraja iliqqacha o‘zgarib turadi. Uchinchi o‘n kunlikda ba’zi joylarda 1 daraja sovuqqacha bo‘lishi mumkin. Umuman, oktabr oyi harorat tartibi bo‘yicha me’yor atrofida, ba’zi joylarda me’yordan 1-1,5 darajaga past bo‘lishi kutilmoqda.
Iqlimiy me’yorlarga asosan, O‘zbekistonning janubiy viloyatlari bo‘yicha oktabr oyida 3 kundan 5 kungacha, qolgan hududlarda 5 kundan 7 kungacha yog‘ingarchilik bo‘ladi. Oktabr oyida yog‘ingarchilik, asosan, yomg‘ir ko‘rinishida yog‘adi, ammo keskin sovuq bo‘lganda yomg‘ir qisqa muddatga qorga aylanishi mumkin. Oxirgi marta 2018-yilning oktabr oyida Toshkentda yomg‘ir qorga aylanishi kuzatilgan.
Kechalari havo haroratining o‘rtacha ko‘p yillik qiymatlari 6-11 darajani tashkil etadi, kamdan kam hollarda oktabr oyida, ayniqsa, oyning ikkinchi yarmida birinchi kuzgi sovuqlar kuzatiladi.
Oktabr oyida havo harorati odatda 23-28 daraja iliqdan 10-15 daraja iliqqacha o‘zgarib turadi.
Izoh (0)