Шавкат Мирзиёев таклифига биноан Туркманистон президенти Гурбангули Бердимуҳамедов 4 октябрь куни расмий ташриф билан Ўзбекистонга келгани тўғрисида хабар берилганди. 5 октябрь куни Кўксарой қароргоҳида Туркманистон президентини расмий кутиб олиш маросими ва президентлар ўртасидаги тор доирадаги учрашувдан сўнг икки мамлакат расмий делегациялари иштирокидаги музокаралар кенгайтирилган таркибда давом этди.
Президент матбуот хизматининг хабар беришича, учрашувда биргаликдаги саъй-ҳаракатлар туфайли биродар мамлакатларимиз ўртасидаги муносабатлар сифат жиҳатидан янги, стратегик шериклик даражасига кўтарилгани алоҳида таъкидланди.
Давлат раҳбарлари кейинги йиллардаги ўзаро савдо суръатини мамнуният билан қайд этиб, товар айирбошлаш ҳажмини янада кўпайтириш учун мавжуд барча ресурс ва имкониятларни ишга солишга келишиб олди. Савдо уйларини ташкил этиш ва учинчи мамлакатлар бозорларига чиқишни назарда тутган ҳолда ўзаро етказиб берилаётган маҳсулотларнинг номенклатурасини кенгайтириш ва диверсификация қилиш — бу борадаги йўналишлардан биридир.
Учрашувда, шунингдек, турли тармоқларда саноат кооперациясини ривожлантириш, шу жумладан автомобиллар йиғиш, кимёвий маҳсулотлар, электр техникаси ва маиший техника, қурилиш материалларини ишлаб чиқариш, пахта толаси ва мева-сабзавот маҳсулотларини чуқур қайта ишлаш, логистика инфратузилмасини яратиш ҳам икки томонлама ҳамкорликнинг истиқболли йўналишлари сифатида белгилаб олинди.
Ўзбекистон Президенти тегишли «йўл харитаси»ни тайёрлашни таклиф қилди.
Томонлар транспорт соҳасида ва транзит йўлакларини ривожлантириш бўйича ҳамкорликни фаоллаштиришга келишиб олдилар. Ашхобод битимини биргаликда илгари суриш ҳамда Туркманбоши денгиз портининг ноёб имкониятларидан фойдаланишни кенгайтириш муҳим экани таъкидланди.
Бу борадаги ўзаро мувофиқлаштирилган қўшма саъй-ҳаракатлар юк ташишлар ҳажмини ошириш ҳамда транзит салоҳиятини рўёбга чиқариш учун қулай шароитлар яратади.
Икки мамлакат ҳудудларидаги имкониятларни янада тўлиқ ишга солиш муҳим экани қайд этилди. Ҳамкорликнинг янги механизми — ҳудудлараро форум ўтказишни йўлга қўйиш юзасидан келишувга эришилди.
Сув хўжалиги соҳасидаги ҳамкорлик юксак баҳоланди. Сув хўжалиги масалалари бўйича ҳукуматлараро комиссиянинг биринчи йиғилиши муваффақиятли ўтказилгани олқишланди. Туямўйин сув омборининг Султон Санжар тўғонини реконструкция қилиш лойиҳасини амалга ошириш бошлангани мамнуният билан қайд этилди.
Маданий-гуманитар соҳадаги ҳамкорлик масалалари ҳам муҳокама қилинди.
Шавкат Мирзиёев Ўзбекистонда туркман миллатига мансуб 200 минг нафардан зиёд фуқаро истиқомат қилаётганини, улар ўз тили, маданияти, анъана ва урф-одатларини ривожлантиришлари учун бундан буён ҳам барча шароитларни яратилишини таъкидлади. «Ишончим комил, ҳурматли Гурбангули Мяликгулиевич ташаббуси билан Ашхободда барпо этилаётган ‘Тошкент’ боғи халқларимиз дўстлигининг навбатдаги янги рамзи бўлади», — деб қайд этган Президент.
Музокараларда Афғонистонда тинчлик ва барқарорлик бутун Марказий Осиё минтақасида барқарор тараққиёт гарови экани таъкидланди.
Президентлар халқаро майдонда, шу жумладан, БМТ, МДҲ, Европада хавфсизлик ва ҳамкорлик ташкилоти, Иқтисодий ҳамкорлик ташкилоти, Ислом ҳамкорлик ташкилоти, Туркий тилли давлатлар ҳамкорлиги ташкилоти ва бошқа халқаро тузилмалар доирасида яқин мулоқотни давом эттириш ва ташаббусларни биргаликда илгари суришга келишиб олди.
Музокаралар якунида президентлар икки томонлама ҳамкорлик бўйича ҳукуматлараро комиссия ҳамраисларига эришилган келишувларни амалга оширишнинг аниқ механизмларини ўз ичига олган «йўл харитаси»ни тайёрлашга топшириқ берди.
Изоҳ (0)