2021-yilning avgust oxirlarida Toshkentda 35 yoshli erkak o‘g‘li bilan urishib qolgan 11 yoshli bolani kaltaklagani to‘g‘risida xabar berilgandi. “Sevimli” telekanalining “Zamon” informatsion dasturida ma’lum qilinishicha, zo‘ravon erkakka nisbatan jazo tayinlangan.
22-avgust kuni fuqaro D.O‘. Toshkent shahar IIBBga 102 raqami orqali murojaat qilib, o‘g‘lini urgan qo‘shnisiga nisbatan qonuniy chora ko‘rishni so‘ragan.
Aniqlanishicha, shu kuni soat 14:00 larda Chilonzor tumani 8-mavzeda istiqomat qiluvchi yosh bolalar o‘zaro urishib qolgan. Ularning tortishuviga bolalardan birining otasi — 35 yoshli Q.B. aralashgan hamda voyaga yetmagan 11 yoshli bola — K.A.ni urib tan jarohati yetkazgan.
Holat bo‘yicha o‘tkazilgan sud ishida ayblanuvchi erkak qilmishidan pushaymonligini aytib, qo‘shnilaridan kechirim so‘ragan. Jabrlangan bolaning onasi esa qamoq ehtiyot chorasi qo‘shnisiga dars bo‘lganidan umidvor va da’vosi yo‘qligini bildirgan.
Sud hukmiga ko‘ra, D.O‘. Jinoyat kodeksining 109-moddasi (qasddan badanga yengil shikast yetkazish) 2-qismi bilan aybli deb topilib, unga uzil-kesil o‘tash uchun ish haqining 10 foizini davlat daromadiga ushlab qolgan holatda 1 yil 2 oy 18 kun axloq tuzatish ishlari tayinlangan. Erkakka nisbatan qo‘llanilgan qamoqda saqlash ehtiyot chorasi bekor qilinib, u sud majlisida ozod qilingan.
Avvalroq Toshkentda ijtimoiy tarmoqda haqorat qilgani uchun tanishini kaltaklagan 17 yoshli qizning onasi jarimaga tortilgani to‘g‘risida xabar berilgandi.
Izoh (0)