Toshkentning Chilonzor tumanidagi ko‘p qavatli uylardan birida gaz-havo aralashmasining chaqnashi oqibatida portlash sodir bo‘lgandi. Bosh prokuratura axborot xizmati rahbari Hayot Shamsutdinovning “Daryo”ga ma’lum qilishicha, holat yuzasidan jinoyat ishi qo‘zg‘atildi.
Ma’lum qilinishicha, 3-oktabr kuni soat 22:10 larda Chilonzor tumani, 7-mavze, 59-uyning 2-kirish yo‘lagi, 2-qavati, 36-xonadon oshxonasida o‘rnatilgan gaz qurilmalaridan maishiy gaz sizib chiqib to‘planishi va gaz-havo aralashmasining chaqnashi oqibatida portlash sodir bo‘lgan.
Natijada jami 14 xonadonga hamda binoda o‘rnatilgan yo‘lovchi tashish lift qurilmasiga jiddiy zarar yetgan. Xususan, FVV matbuot xizmatining “Daryo”ga ma’lum qilishicha, gaz portlagan uyning oynalari va eshiklari singan, uning qarshisidagi xonadon eshigiga ham zararlangan. Qolgan xonadonlarning, asosan, kirish eshiklariga zarar yetgan xolos. Hodisa oqibatida uy aholisi jabrlanmagan. Qurbonlar yo‘q.
Voqea yuz bergan kuni 17 nafar uyi shikastlangan fuqaro vaqtinchalik mehmonxonaga joylashtirilgan. 4-oktabr kuni esa ular birin-ketin uylariga qayta boshladi.
“Hududgazta’minot” ma’lumotlariga ko‘ra, ushbu ko‘p qavatli uy hali foydalanishga topshirilmagan bo‘lgan, xonadon egasi esa gaz tizimiga ruxsatsiz ulangan.
“Uy qurilishi hali tugallanmaganligi va yangi bino foydalanishga topshirilmaganligi sababli gaz ta’minoti tashkilotlari tomonidan gazni ulashga ruxsat berilmagan. Dastlabki ma’lumotlarga ko‘ra, xonadon egasi uyni gazlashtirish bo‘yicha payvandlash ishlarini olib borish uchun payvandchini shaxsan jalb qilgan va gaz ta’minoti tizimiga o‘zboshimchalik bilan ulangan”, — deb qayd etgan “Hududgazta’minot” “Podrobno.uz”ga.
4-oktabr kuni tuman IIB tomonidan holat yuzasidan Jinoyat kodeksining 257-moddasi (mehnatni muhofaza qilish qoidalarini buzish) 1-qismi bilan jinoyat ishi qo‘zg‘atilgan.
Izoh (0)