O‘zbekistonda koronavirusga qarshi vaksinatsiya boshlanganiga yarim yil bo‘ldi. Shu sababli Sog‘liqni saqlash vazirligi vaksinatsiyaga oid yarim yillik statistik ma’lumotlar tahlilini e’lon qildi.
Unga ko‘ra, O‘zbekistonda 30-sentabrga kelib emlanishi ko‘zda tutilgan (18 yoshdan yuqori bo‘lgan 21,5 million kishi) aholining 53,6 foizi (11 491 111 nafari) koronavirusga qarshi birinchi doza vaksinalarini olib bo‘ldi.
Shu vaqt davomida mamlakatda emlanishi rejalashtirilgan aholining 21,2 foizi, ya’ni 4 539 621 nafari to‘liq emlandi.
Shundan:
- 534 764 nafari 65 yoshdan oshganlar,
- 332 722 nafari tibbiyot xodimlari,
- 290 071 nafari maktab o‘qituvchilari,
- 109 235 nafari maktabgacha ta’lim muassasalari xodimlari,
- 478 896 nafari surunkali kasalligi bor fuqarolar va hokazo.
Emlash jarayonlariga jalb qilingan aholi soni bo‘yicha Andijon viloyati yetakchilik qilmoqda. Umumiy emlash statistikasiga ko‘ra Farg‘ona, Namangan, Andijon viloyatlari emlash jarayonlarida peshqadam bo‘lib turibdi.
Ayni paytda emlash jarayonlarida 5 turdagi vaksinadan foydalanilmoqda: ZF-UZ-VAC2001 (o‘zbek-xitoy), AstraZeneca, “Sputnik V”, Moderna va Pfizer/BioNTech.
Yarim yil davomida jami 20 781 994 doza vaksina qo‘llanilgan bo‘lsa, shundan 78 foizi ZF-UZ-VAC 2001 vaksinasidir. Jami qo‘llanilgan o‘zbek-xitoy vaksinasi 16 120 621 dozaga yetgan.
Ayni paytda o‘zbek-xitoy vaksinasi bilan to‘liq emlangan aholi soni 2,6 million nafardan ortiqni tashkil etadi.
Shu paytga qadar O‘zbekistonga 20 499 668 million doza ZF-UZ-VAC2001 vaksinasi keltirilgan. Shuningdek, ushbu vaksinani O‘zbekistonda ishlab chiqarish ham yo‘lga qo‘yildi.
Yarim yil davomida jami qo‘llanilgan vaksinaning 5 foizini AstraZeneca tashkil qilmoqda. Umumiy hisobda qo‘llanilgan AstraZeneca vaksinasi 1 125 557 dozaga yetgan. Ayni paytda 462 ming nafardan ortiq fuqaro AstraZeneca vaksinasi bilan to‘liq emlangan.
30-sentabr holatiga ko‘ra, yarim yil davomida emlash jarayonlarida umumiy hisobda 447 855 doza “Sputnik V” vaksinasi qo‘llanildi. Ayni paytda 218 ming nafardan ortiq fuqaro ushbu vaksina bilan to‘liq emlangan.
Vazirlik xabarida ta'kidlanishicha, Rossiyada ishlab chiqarilgan ushbu vaksina birinchi va ikkinchi bosqichda emlash uchun alohida-alohida komponentlarga ega bo‘lib, 1-doza uchun keltirilgan komponentni 2-doza uchun qo‘llash mumkin emas.
Umumiy qo‘llanilgan vaksinaning 13 foizini Moderna vaksinasi tashkil qilmoqda. 30-sentabr holatiga ko‘ra, ushbu vaksinadan jami 2 692 705 doza qo‘llanilgan.
Ayni paytda 1,2 million nafardan ortiq fuqaro Moderna vaksinasi bilan to‘liq emlangan. Shu paytga qadar O‘zbekistonda jami 3 000 060 doza Moderna vaksinasi keltirilgan.
Pfizer/BioNTech vaksinasidan esa 30-sentabr holatiga ko‘ra, 395 256 doza qo‘llanilgan bo‘lib, uning barcha dozalari 1-bosqichda emlash uchun foydalanilgan. Shu paytga qadar O‘zbekistonga ushbu vaksinadan jami 1,2 million doza keltirilgan.
Eslatib o‘tamiz, hukumat 1-noyabrgacha aholining 70 foizini emlashni maqsad qilgan.
Izoh (0)