Ma’lumotlar monitoringi bo‘yicha mustaqil qo‘mita koronavirusga qarshi ZF-UZ-VAC2001 vaksinasi bilan 3 yoshdan katta bo‘lgan bolalarda ham emlashni ma’qulladi. Bu haqda Telegram’dagi “Vaksina.uz” kanali xabar berdi.

Foto: “Daryo” / Madina Nurman

Ma’lum qilinishicha, Xitoy–O‘zbekiston hamkorligida yaratilgan ZF-UZ-VAC2001 vaksinasini 3-5, 6-11 va 12-17 yoshdagi bolalarda qo‘llash xavfsizligi DSMB (Data Safety Monitoring Board) – Ma’lumotlar monitoringi bo‘yicha mustaqil qo‘mita tomonidan tasdiqlangan.

DSMB – mustaqil ekspertlar guruhi bo‘lib, ular tadqiqotlar natijalariga ko‘ra tadqiqotda ishtirok etganlarning xavfsizligini tahlil qiladi va baholaydi.

Hozirda Xitoyda 12-17 yoshli bir guruh bolalar ZF-UZ-VAC2001 vaksinasining 3 ta dozasi, 6-11 va 3-5 yoshli bolalar guruhlari esa vaksinaning birinchi dozasi bilan emlangan. Ta’kidlanishicha, bolalarning salomatligida nojo‘ya ta’sirlar kuzatilmagan.

Avvalroq O‘zbekistonda 12 yoshdan katta bolalarni ham koronavirusga qarshi Pfizer vaksinasi bilan ixtiyoriy ravishda emlashga ruxsat berilgandi.

Eslatib o‘tamiz, O‘zbekistonga 24-sentabr kuni 2 499 668 doza ZF-UZ-VAC2001 vaksinasi olib kelingandi. Shunday qilib, O‘zbekistonga hozirga qadar olib kelingan o‘zbek—xitoy vaksinasi 20 499 668 million dozasini tashkil etmoqda.