“Afrosiyob” poyezdining yangi tarkibi Toshkentga yetib keldi

Sankt-Peterburg portidan O‘zbekistonga yuborilgan “Afrosiyob” tezyurar poyezdi Toshkentga yetib keldi, deb xabar beradi “O‘zbekiston temir yo‘llari” AJ matbuot xizmati.

Ispaniyaning Patentes Talgo S.L.U. kompaniyasi hamda “O‘zbekiston temiryo‘llari” o‘rtasida tuzilgan shartnomaga binoan 16-sentabr kuni “Afrosiyob” poyezdining yana bitta harakat tarkibi Ispaniyaning Bilbao portidan Rossiyaning Sankt-Peterburg portiga olib kelingani to‘g‘risida xabar berilgandi. 25-sentabr kuni esa ushbu poyezd Rossiyaning Sankt-Peterburg portidan yo‘lga chiqqan edi.

Ma’lumot uchun, 2019-yilning iyun oyida “O‘zbekiston temir yo‘llari” AJ Ispaniyaning Patentes Talgo S.L.U. kompaniyasi bilan Talgo-250 seriyali ikkita tezyurar elektropoyezd sotib olish uchun shartnoma imzolangan. Kelishuvlarga ko‘ra, 2021-yil oktabr oyigacha “O‘zbekiston temir yo‘llari” AJ lokomotiv parkini ikkita tezyurar “Afrosiyob” elektropoyezdi bilan to‘ldirish kerak edi. Ispaniyaning Patentes Talgo S.L.U. kompaniyasi o‘z majburiyatlarini to‘liq va o‘z vaqtida bajargan.

Ta’kidlanishicha, ushbu harakatlanuvchi tarkib ketma-ket oltinchisi bo‘lib, investitsiya loyihasi doirasida sotib olingan. Investitsiya loyihasiga ko‘ra, ikkita poyezddan tashqari, ispan kompaniyasi to‘rtta zaxira ekonom-klassli vagonlar, shuningdek, poyezdlarga texnik xizmat ko‘rsatish uchun uskunalar yetkazib beradi. Shartnoma Ispaniya kompaniyalarini korporativ xalqarolashtirish jamg‘armasi (FIEM) krediti hisobidan moliyalashtiriladi.

“O‘ztemiryo‘lyo‘lovchi” AJ matbuot xizmatining ma’lum qilishicha, 1-oktabr kuni Toshkent markaziy temiryo‘l vokzalida “Afrosiyob” poyezdining kelishi tantanali ravishda kutib olingan.

Qayd etilishicha, yaqin kelajakda Buxoro–Xiva yo‘nalishidagi temiryo‘lda elektrlashtirish ishlari yakunlangach, yuqori tezlikda harakatlanuvchi poyezdlarning Xiva shahrigacha qatnovi yo‘lga qo‘yilishi ko‘zda tutilgan.

Yangi poyezd bugungi kunda O‘zbekistonda foydalanilayotgan ushbu turdagi poyezdlardan sezilarli farq qilmaydi. 2 ta bosh lokomotiv va 11 ta, shu jumladan, 2 ta VIP, 2 ta Biznes, 6 ta Ekonom va 1 ta Bistro toifadagi vagonlardan iborat. O‘rindiqlar soni – 286 ta.