O‘zbekiston Prezidenti Shavkat Mirziyoyev Xitoy raisi Si Szinpinga milliy bayram — Xitoy tashkil topgan kun munosabati bilan tabrikladi, deb xabar beradi davlat rahbarining matbuot xizmati.
Shavkat Mirziyoyev Xitoy yetakchisiga mustahkam sog‘lik, oilaviy baxt va katta muvaffaqiyatlar, do‘st Xitoy xalqiga esa tinchlik-osoyishtalik va ravnaq tilagan.
“Xitoyning global xavfsizlik va barqarorlikni ta’minlash, yangi tahdid va xatarlarga, shu jumladan, iqlim o‘zgarishi va COVID-19 pandemiyasiga qarshi samarali kurashishdagi faol sa’y-harakatlari va salmoqli hissasi eng yuksak e’tirofga munosib.
Keyingi yillarda O‘zbekiston va Xitoy o‘rtasidagi o‘zaro hurmat, ishonch va qo‘llab-quvvatlash tamoyillariga asoslangan do‘stlik, har tomonlama strategik sheriklik munosabatlari izchil rivojlanib borayotganini katta mamnuniyat bilan qayd etmoqchiman.
O‘rtamizdagi do‘stona, o‘zaro ishonchga asoslangan mustahkam shaxsiy munosabatlarimizni chin dildan e’zozlayman. Sizning ko‘p qirrali O‘zbekiston—Xitoy hamkorligiga qaratayotgan alohida e’tiboringizni yuksak qadrlayman.
Ishonchim komil, sizning bo‘lajak davlat tashrifingiz va Shanxay hamkorlik tashkilotining O‘zbekistondagi sammitida ishtirokingiz mamlakatlarimiz o‘rtasidagi keng ko‘lamli sheriklikni yangi bosqichga ko‘tarishga xizmat qiladi”, — deyiladi maktubda.
Eslatib o‘tamiz, aprel oyida Prezident Shavkat Mirziyoyevning Si Szinpin bilan bo‘lib o‘tgan telefon suhbati davomida Xitoy raisining O‘zbekistonga tashrif buyurishi ma’lum bo‘lgandi.
Ma’lumot uchun, Si Szinpin 2016-yilning iyunida Shanxay hamkorlik tashkiloti Davlat rahbarlari kengashining Toshkentdagi yig‘ilishida ishtirok etgandi.
Izoh (0)