«Афросиёб» поездининг янги таркиби Тошкентга етиб келди

Санкт-Петербург портидан Ўзбекистонга юборилган «Афросиёб» тезюрар поезди Тошкентга етиб келди, деб хабар беради «Ўзбекистон темир йўллари» АЖ матбуот хизмати.

Испаниянинг Patentes Talgo S.L.U. компанияси ҳамда «Ўзбекистон темир йўллари» ўртасида тузилган шартномага биноан 16 сентябрь куни «Афросиёб» поездининг яна битта ҳаракат таркиби Испаниянинг Бильбао портидан Россиянинг Санкт-Петербург портига олиб келингани тўғрисида хабар берилганди. 25 сентябрь куни эса ушбу поезд Россиянинг Санкт-Петербург портидан йўлга чиққан эди.

Маълумот учун, 2019 йилнинг июнь ойида «Ўзбекистон темир йўллари» АЖ Испаниянинг Patentes Talgo S.L.U. компанияси билан Talgo-250 серияли иккита тезюрар электропоезд сотиб олиш учун шартнома имзоланган. Келишувларга кўра, 2021 йил октябрь ойигача «Ўзбекистон темир йўллари» АЖ локомотив паркини иккита тезюрар «Афросиёб» электропоезди билан тўлдириш керак эди. Испаниянинг Patentes Talgo S.L.U. компанияси ўз мажбуриятларини тўлиқ ва ўз вақтида бажарган.

Таъкидланишича, ушбу ҳаракатланувчи таркиб кетма-кет олтинчиси бўлиб, инвестиция лойиҳаси доирасида сотиб олинган. Инвестиция лойиҳасига кўра, иккита поезддан ташқари, испан компанияси тўртта захира эконом-классли вагонлар, шунингдек, поездларга техник хизмат кўрсатиш учун ускуналар етказиб беради. Шартнома Испания компанияларини корпоратив халқаролаштириш жамғармаси (FIEM) кредити ҳисобидан молиялаштирилади.

«Ўзтемир йўлйўловчи» АЖ матбуот хизматининг маълум қилишича, 1 октябрь куни Тошкент марказий темир йўл вокзалида «Афросиёб» поездининг келиши тантанали равишда кутиб олинган.

Қайд этилишича, яқин келажакда Бухоро–Хива йўналишидаги темир йўлда электрлаштириш ишлари якунлангач, юқори тезликда ҳаракатланувчи поездларнинг Хива шаҳригача қатнови йўлга қўйилиши кўзда тутилган.

Янги поезд бугунги кунда Ўзбекистонда фойдаланилаётган ушбу турдаги поездлардан сезиларли фарқ қилмайди. 2 та бош локомотив ва 11 та, шу жумладан, 2 та VIP, 2 та Бизнес, 6 та Эконом ва 1 та Бистро тоифадаги вагонлардан иборат. Ўриндиқлар сони – 286 та.