BBC Uzbek nashri ikki oyog‘i yo‘qligiga qaramay, barcha yumushlarini mustaqil uddalab kelayotgan narpaylik Sohiba Quvonova haqida lavha tayyorladi.
Ma’lum qilinishicha, Samarqand viloyati Narpay tumanida yashovchi Sohiba Quvonova 1984-yilda tug‘ilgan, oyog‘idan ajralganida 6 oylik bo‘lgan. Hozirda u tikuvchilik bilan kun ko‘radi. Sohiba hatto ba’zi sog‘lom odamlar bajara olmaydigan yumushlarni uddalashga qodir, masalan, hovlidagi sigirlarni sug‘orib, boqadi, sutini sog‘ib oladi, hovlidagi dehqonchilik ishlarini ham uddalaydi.
“Hamma ishni qila olaman, hech kimga muhtojligim yo‘q. Iloji boricha fikrlab, qo‘lim yetmagan narsalarni ham xivich bilan olib, o‘zim mustaqil uddalayman”, — deydi u.
U Prezident farmoniga ko‘ra O‘zbekiston mustaqilligining 30 yilligi sharafiga “Jasorat” medali bilan taqdirlangan.
“ ‘Medalni o‘zing taqib qo‘y’, degan ekanlar [Prezident — tahr.] Samarqand viloyati hokimi o‘z qo‘llari bilan taqib qo‘ydi... ‘Jasorat’ medalini bersa jasoratni his qilarkan odam. O‘zimni juda a’lo darajada his qilayapman, xursandman”, — deydi Sohiba.
Shuningdek, ta’kidlanishicha, Sohiba Quvonovaga 2017-yilda Prezident sovg‘asi sifatida unga kvartira sovg‘a qilingan.
Izoh (0)