Oliy Majlis Senatining o‘n to‘qqizinchi yalpi majlisida Qashqadaryo viloyati hokimining hududlarni rivojlantirish haqidagi hisoboti eshitildi. Bu haqda Senat matbuot xizmati xabar berdi.
Qayd etilishicha, hududda sanoat, xizmat ko‘rsatish va qishloq xo‘jaligi sohalarini rivojlantirish yo‘nalishida qariyb 8,1 trillion so‘mlik 6,3 mingta investitsiya loyihasi ishga tushirilib, 28 mingdan ziyod yangi ish o‘rni yaratilgan. Ijtimoiy sohani rivojlantirish bo‘yicha 122 ta maktabgacha ta’lim tashkiloti, 210 ta umumta’lim maktabi va 81 ta tibbiyot muassasasida qurilish-ta’mirlash ishlari olib borilgan.
Aholining uy-joyga bo‘lgan talabini qondirish maqsadida 10 mingdan ortiq xonadonga ega bo‘lgan 250 dan ziyod ko‘p kvartirali uylar hamda qariyb 4,9 mingta yangi namunaviy uy-joy qurilib, yana viloyatni rivojlantirishga doir bir qancha ishlar qilingan.
Shu bilan birga, majlisda amalga oshirilgan ishlar bilan bir qatorda muammo va kamchiliklar mavjudligi qayd etildi.
Unga ko‘ra, viloyatdagi umumta’lim maktablari uchun respublika “Transport va logistika xizmati” DUK tomonidan 46 foiz darsliklar yetkazib berilgan, xolos. Ushbu darsliklar jamlanmasining 24 foizi to‘liq bo‘lmagani uchun omborxonada saqlanmoqda, buning natijasida o‘quvchilar o‘quv yilini kitobsiz boshladi.
Shuningdek, 2021-yilgi investitsiya dasturi doirasida viloyatdagi 93 ta umumta’lim maktabini jihozlash belgilangan bo‘lib, shundan 36 tasiga mebel va jihozlar qisman yetkazib berilgan, qolgan 57 tasiga esa umuman yetkazib berilmagan.
Hududda 2021-yil 1-sentabr holatiga ko‘ra, 3 ming 108 ta jinoyat sodir etilgan bo‘lib, ushbu ko‘rsatkich 2020-yilning shu davriga nisbatan 70 foizga ortgan. Sodir etilgan jinoyatlardan 1 ming 828 tasini (shundan 963 tasi mahallada sodir etilgan) yoki 58,8 foizini oldini olish mumkin bo‘lgan jinoyatlar tashkil etgan.
Izoh (0)