O‘zbekistonda 10 dan ortiq bukmekerlik xizmatlarini ko‘rsatuvchi veb-saytlar bloklandi

O‘zbekistonda 10 dan ortiq bukmekerlikka aloqador saytlarga kirish cheklandi, deya xabar bermoqda Iste’molchilar huquqlarini himoya qilish agentligi.

O‘zbekistonda bukmekerlik faoliyati noqonuniy hisoblanadi. Ma’muriy javobgarlik to‘g‘risidagi kodeksning 191-moddasi (qimor va tavakkalchilikka asoslangan boshqa o‘yinlar), shuningdek, Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish)ga binoan bu turdagi faoliyat hali ham noqonuniy hisoblanadi.

Shu bilan birga “Reklama to‘g‘risida”gi qonunning 6-moddasiga ko‘ra, reklamada ishlab chiqarilishi yoki realizatsiya qilinishi qonunchilik bilan taqiqlangan mahsulot to‘g‘risidagi axborotni, jumladan, totalizator va bukmekerlik idoralari haqidagi ma’lumotlarni tarqatish taqiqlanadi.

Qayd etilishicha, O‘zbekiston Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi xodimlari muntazam ravishda internet tarmoqlarida joylashtirilayotgan reklama ma’lumotlarining reklama to‘g‘risidagi qonunchilik talablariga muvofiqligini o‘rganib bormoqda.

Agentlikning qayd etishicha, o‘tgan davr mobaynida Axborot va ommaviy kommunikatsiyalar agentligi bilan birgalikda 10 dan ortiq noqonuniy faoliyat yurituvchi saytlarga kirish cheklangan.

Bundan avval O‘zbekiston qonunchiligiga bukmekerlik faoliyatiga ruxsat berish va cheklashni nazarda tutuvchi normalar kiritilishi haqida xabar berilgandi.