Qashqadaryo IIBning vazirdan tanbeh olgan axborotga mas’ul xodimi ishdan olindi. O‘rnida yangi rahbar ish boshladi

Qashqadaryo viloyat IIB axborot xizmati rahbari Iroda Rasulova ichki ishlar vaziri Po‘lat Bobojonovning tanbehidan bir oy o‘tib ishdan olindi. O‘rnida yangi rahbar ish boshladi. Bu haqda viloyat IIB axborot xizmatining rasmiy saytida ma’lumot berildi.

Qayd etilishicha, viloyatda IIB axborot xizmati rahbari sifatida ayni kunga qadar viloyat Yo‘l harakati xavfsizligi boshqarmasi axborot xizmati rahbari vazifasida ishlab kelgan Javlon Baxtiyev ish boshlagan.

Eslatib o‘tamiz, Qarshi shahrida bosh prokuror Nig‘matilla Yo‘ldoshev, ichki ishlar vaziri Po‘lat Bobojonov hamda Oliy sud raisi Kozimjon Komilov ishtirokida sportchi yigit Elbek Rahimovning o‘limi yuzasidan bo‘lib o‘tgan matbuot anjumanida viloyatda faoliyat yurituvchi OAV vakillari Iroda Rasulova faoliyatidan qoniqmayotganini bildirgandi. Mazkur e’tirozga fikr bildirgan Po‘lat Bobojonov esa bu masalaga e’tibor qaratishini va tez orada xulosa qilinishini aytgandi. Biroz o‘tib esa Po‘lat Bobojonovning matbuot kotibi Shohrux G‘iyosov Iroda Rasulovaga tanbeh berilganini, ishda qolish-qolmaslik masalasi ham so‘roq ostida turganini ma’lum qilgandi.