AQSh shtab boshliqlari birlashgan qo‘mitasi raisi general Mark Milli va Rossiya Qurolli kuchlari bosh shtabi boshlig‘i Valeriy Gerasimov Finlyandiyada o‘tgan yuzma-yuz uchrashuvda AQSh harbiylarining Markaziy Osiyodagi Rossiya bazalaridan foydalanish imkoniyatlarini muhokama qildi. Bu haqda manbalarga tayanib, The Wall Street Journal (WSJ) xabar berdi.
Qayd etilishicha, Gerasimov hamkasbiga hech qanday va’da bermagan. Nashrning ta’kidlashicha, bu mavzu AQSh prezidenti Jo Bayden ma’muriyati Afg‘onistondan qo‘shinlarni tezlik bilan olib ketganidan so‘ng, bu mamlakatda yuzaga kelishi mumkin bo‘lgan terrorchilik tahdidlarni kuzatish va ularga javob qaytarish uchun yangi imkoniyatlarni qidirayotgani tufayli ko‘tarilgan.
“AQSh va Rossiya terrorizm xavfidan xavotirda bo‘lsa-da, Rossiya bilan terrorizmga qarshi kurashish g‘oyasi, ayniqsa, siyosiy jihatdan, qiyinchiliklarga to‘la”, — deyiladi nashrda.
Kreml vakili WSJga ushbu ma’lumot bo‘yicha izoh berishdan bosh tortdi.
Gerasimov va Milli 22-sentabr kuni Xelsinkidan 40 km uzoqlikdagi Vantaa shahrida uchrashgandi. Rossiya Mudofaa vazirligi uchrashuvda “o‘zaro manfaatli” masalalar muhokama qilinganini va u konstruktiv tarzda o‘tganini aytgan. Assosiated Press agentligining yozishicha, har ikki tomon ham muzokaralar tafsilotlarini oshkor qilmaslikka kelishib olgan. Milli keyinchalik: “Bu samarali uchrashuv bo‘ldi. Buyuk davlatlarning harbiy rahbarlari muloqot qilganda, dunyo xavfsizroq joyga aylanadi”, degan.
Pentagon matbuot kotibi Jon Kirbi Milli va Gerasimovning uchrashuviga izoh berar ekan, AQSh Qurolli kuchlari rossiyalik hamkasblari bilan ziddiyatlarning oldini olish uchun muhim bo‘lgan aloqalarni faqat zarurat darajasida olib borayotganini aytdi.
May oyida WSJ AQSh Afg‘oniston bilan chegaradosh O‘zbekiston va Tojikistonda o‘z harbiy bazalarini joylashtirish imkoniyatlarini ko‘rib chiqayotganini yozgan. Bazalarni joylashtirish variantlari sifatida Vashington arab davlatlari va dengizdagi harbiy dengiz kuchlari kemalarini ham ko‘rib chiqqan. Agar ularni Afg‘onistonga qo‘shni mamlakatlarga joylashtirish imkonsiz bo‘lib chiqsa, bu variantlar ishlab chiqiladi. O‘zbekiston Mudofaa vazirligi ushbu xabarga izoh berar ekan, mudofaa doktrinasida mamlakat hududida xorijiy harbiy bazalar va inshootlarni joylashtirish nazarda tutilmaganini bildirdi.
Iyul oyida “Kommersant” manbalarga tayanib yozgan xabarga ko‘ra, 16-iyun kuni Jenevada bo‘lib o‘tgan sammitda Rossiya prezidenti Vladimir Putin AQSh prezidenti Jo Baydenga Afg‘oniston sektoridagi harakatlarni Moskva bilan muvofiqlashtirishni, Tojikiston va Qirg‘izistondagi Rossiya bazalarini amaliy maqsadlarda ishlatish imkoniyatini taklif qildi. Kreml bu ma’lumotni na tasdiqladi va na inkor etdi.
201-Rossiya harbiy bazasi Tojikistonda bo‘lib, garnizon Dushanbe va Boxtar shaharlarida joylashtirilgan. Bu Rossiyaning chegaralaridan tashqaridagi eng yirik harbiy obyekti. Baza motorli miltiq artilleriyasi, razvedka, zenit-raketa va boshqa bo‘linmalar, shuningdek, harbiy havo guruhini o‘z ichiga oladi.
Qirg‘izistonning Chuy viloyatida esa Rossiyaning “Kant” aviabazasi joylashgan, u 2003-yildan buyon ishlaydi. U yerda “Su-25” hujumchi samolyotlari va “Mi-8MTV” vertolyotlari saqlanadi.
Izoh (0)