АҚШ штаб бошлиқлари бирлашган қўмитаси раиси генерал Марк Милли ва Россия Қуролли кучлари бош штаби бошлиғи Валерий Герасимов Финляндияда ўтган юзма-юз учрашувда АҚШ ҳарбийларининг Марказий Осиёдаги Россия базаларидан фойдаланиш имкониятларини муҳокама қилди. Бу ҳақда манбаларга таяниб, The Wall Street Journal (WSJ) хабар берди.
Қайд этилишича, Герасимов ҳамкасбига ҳеч қандай ваъда бермаган. Нашрнинг таъкидлашича, бу мавзу АҚШ президенти Жо Байден маъмурияти Афғонистондан қўшинларни тезлик билан олиб кетганидан сўнг, бу мамлакатда юзага келиши мумкин бўлган террорчилик таҳдидларни кузатиш ва уларга жавоб қайтариш учун янги имкониятларни қидираётгани туфайли кўтарилган.
«АҚШ ва Россия терроризм хавфидан хавотирда бўлса-да, Россия билан терроризмга қарши курашиш ғояси, айниқса, сиёсий жиҳатдан, қийинчиликларга тўла», — дейилади нашрда.
Кремль вакили WSJ’га ушбу маълумот бўйича изоҳ беришдан бош тортди.
Герасимов ва Милли 22 сентябрь куни Хелсинкидан 40 км узоқликдаги Вантаа шаҳрида учрашганди. Россия Мудофаа вазирлиги учрашувда «ўзаро манфаатли» масалалар муҳокама қилинганини ва у конструктив тарзда ўтганини айтган. Assosiated Press агентлигининг ёзишича, ҳар икки томон ҳам музокаралар тафсилотларини ошкор қилмасликка келишиб олган. Милли кейинчалик: «Бу самарали учрашув бўлди. Буюк давлатларнинг ҳарбий раҳбарлари мулоқот қилганда, дунё хавфсизроқ жойга айланади», деган.
Пентагон матбуот котиби Жон Кирби Милли ва Герасимовнинг учрашувига изоҳ берар экан, АҚШ Қуролли кучлари россиялик ҳамкасблари билан зиддиятларнинг олдини олиш учун муҳим бўлган алоқаларни фақат зарурат даражасида олиб бораётганини айтди.
Май ойида WSJ АҚШ Афғонистон билан чегарадош Ўзбекистон ва Тожикистонда ўз ҳарбий базаларини жойлаштириш имкониятларини кўриб чиқаётганини ёзган. Базаларни жойлаштириш вариантлари сифатида Вашингтон араб давлатлари ва денгиздаги ҳарбий денгиз кучлари кемаларини ҳам кўриб чиққан. Агар уларни Афғонистонга қўшни мамлакатларга жойлаштириш имконсиз бўлиб чиқса, бу вариантлар ишлаб чиқилади. Ўзбекистон Мудофаа вазирлиги ушбу хабарга изоҳ берар экан, мудофаа доктринасида мамлакат ҳудудида хорижий ҳарбий базалар ва иншоотларни жойлаштириш назарда тутилмаганини билдирди.
Июль ойида «Коммерсантъ» манбаларга таяниб ёзган хабарга кўра, 16 июнь куни Женевада бўлиб ўтган саммитда Россия президенти Владимир Путин АҚШ президенти Жо Байденга Афғонистон секторидаги ҳаракатларни Москва билан мувофиқлаштиришни, Тожикистон ва Қирғизистондаги Россия базаларини амалий мақсадларда ишлатиш имкониятини таклиф қилди. Кремль бу маълумотни на тасдиқлади ва на инкор этди.
201-Россия ҳарбий базаси Тожикистонда бўлиб, гарнизон Душанбе ва Бохтар шаҳарларида жойлаштирилган. Бу Россиянинг чегараларидан ташқаридаги энг йирик ҳарбий объекти. База моторли милтиқ артиллерияси, разведка, зенит-ракета ва бошқа бўлинмалар, шунингдек, ҳарбий ҳаво гуруҳини ўз ичига олади.
Қирғизистоннинг Чуй вилоятида эса Россиянинг «Кант» авиабазаси жойлашган, у 2003 йилдан буён ишлайди. У ерда «Су-25» ҳужумчи самолётлари ва «Ми-8МТВ» вертолётлари сақланади.
Изоҳ (0)