Исландияда бўлиб ўтган парламент сайловларининг дастлабки натижаларига кўра, Европада биринчи бўлиб ушбу мамлакат парламентида аёллар кўпчилик ўринни қўлга киритган эди. Бироқ қайта санаш натижасида мандатларнинг аксарияти охир-оқибат эркакларга ўтиши маълум бўлди.
Дастлабки натижаларга кўра, аёллар бир палатали парламентдаги 63 та ўриндан 33 тасини эгаллаган. Бироқ Шимоли-ғарбий сайлов округидаги Пиратлар ва Уйғониш партиялари тўплаган овозлар орасида фарқ жуда кичик бўлгани учун сайлов комиссияси овозларни қайта санади, бу эса бешта мандатни қайта тақсимлашга олиб келди. Натижада аёллар парламентда фақат 30 та ўринга эга бўлди.
Парламентнинг олдинги чақириғида аёллар 24 ўринга эгалик қиларди. Исландия 30 нафар аёл депутат билан аёлларнинг парламентдаги ўрни бўйича Европада етакчига айланди — аёлларнинг 48 фоиз улуши билан мамлакат Швеция (47 фоиз) ва Финляндияни (46 фоиз) ортда қолдиради.
Исландия гендер тенглиги бўйича дунёдаги энг илғор мамлакат ҳисобланади, у 12 йил кетма-кет Жаҳон иқтисодий форумининг тегишли рейтингида биринчи ўринни эгаллаб келмоқда. 1961 йилда мамлакат эркаклар ва аёллар учун меҳнатга тенг ҳақ тўлашни кафолатлайдиган дунёдаги биринчи қонунни қабул қилди. 1980 йилда Исландия президенти этиб аёл киши сайланди — бу жаҳон тарихида биринчи шундай ҳодиса.
Ҳозир дунёда парламентида эркаклардан кўра аёллари кўп бўлган учта мамлакат бор — Руанда, Куба ва Никарагуа. Мексика ва Бирлашган Араб Амирликларида эркаклар ва аёллар тенг вакиллик қилади. Ўрта ҳисобда, аёллар бутун дунё бўйлаб парламент депутатларининг тўртдан бир қисмини ташкил қилади.
Исландиядаги сайлов натижалари сайлов комиссияси расмий сайтида ҳозирча эълон қилинмаган, улар ҳали ўзгариши ҳам мумкин. 26 сентябрь оқшомида «Яшил сўллар» ҳаракати комиссияга Жанубий сайлов округидаги овозларни қайта санашни талаб қилган расмий сўров юборди — «Яшил сўллар» ҳаракати ва Марказий партияси номзодлари орасидаги фарқ фақат бир нечта овозни ташкил қилган.
Изоҳ (0)