Jizzax, Samarqand va Namangan viloyatlarining tuman prokurorlari pora olayotganida DXX xodimlari tomonidan ushlandi. Bu haqda idoraning “O‘zbekiston 24” telekanaliga tayyorlagan lavhasida e’lon qilindi.
Ma’lum qilinishicha, Jizzax viloyatidagi tumanlardan birining prokurori ta’mirlash va obodonlashtirish ishlari bilan shug‘ullanuvchi DUKning mansabdor shaxslari va boshqalariga nisbatan qo‘zg‘atilgan jinoyat ishi doirasida qurilish firmasi rahbariga qamoqqa olish ehtiyot chorasi qo‘llamaslikni va’da qilgan. Shuningdek, u mazkur firmada aniqlangan kamomad miqdorini kamaytirib ko‘rsatish uchun undan 2 ming dollar so‘ragan va kelishilgan pulning 1,2 ming dollarini olgan. Tuman prokurori so‘ralgan pulning qolgan 800 dollarini olgan vaqtida ashyoviy dalillar bilan ushlangan.
Shuningdek, Samarqand viloyatidagi tuman prokurorlaridan birining o‘rinbosari mahalliy fermer xo‘jaligi rahbariga nisbatan sud tomonidan tayinlangan 3 yil ozodlikni cheklash jazosini boshqa og‘irroq jazo turiga o‘zgartirish uchun protest kiritib, sudning apellyatsiya bosqichida hukmni o‘z kuchida qoldirish evaziga 10 ming dollar talab qiladi.
DXXning viloyat boshqarmasi tomonidan o‘tkazilgan tezkor tadbirda prokuror o‘rinbosarining topshirig‘i bilan uning vositachisi so‘ralgan pulni olgan vaqtida ushlangan. Prokuror o‘rinbosarining aloqadorligi vositachisi bergan ko‘rsatma asosida o‘tkazilgan tadbirda ashyoviy dalillar bilan isbotlangan.
Namangan viloyatida esa tuman MIB rahbari mahalliy fuqaroni Qirg‘izistondagi Jalolobod davlat universitetidagi o‘qishini Andijon davlat tibbiyot universitetiga Oliy ta’lim vazirligidagi tanishlari orqali ko‘chirishda yordam berishini va’da qilgan. Xizmat evaziga u 700 dollar
hamda 1 million 50 ming so‘mni oladi. U qolgan pullarni talab qilib, 200 dollar va 1 million 50 ming so‘m olgan vaqtida ashyoviy dalillar bilan qo‘lga olingan.
Mazkur shaxslarga nisbatan Jinoyat kodeksining tegishli moddalari bilan jinoiy ishlar ochilgan. Hozirda tergov harakatlari olib borilmoqda.
Avvalroq Buxoroda bojxona inspektori xizmati evaziga 400 dollar olayotganida qo‘lga olingani, Namanganda fuqaroning Qirg‘izistondagi o‘qishini 6 ming dollar evaziga ko‘chirib berishni va’da qilgan talaba va universitet o‘qituvchilari ushlangani to‘g‘risida xabar beriglandi.
Izoh (0)