Жиззах, Самарқанд ва Наманган вилоятларининг туман прокурорлари пора олаётганида ДХХ ходимлари томонидан ушланди. Бу ҳақда идоранинг «Ўзбекистон 24» телеканалига тайёрлаган лавҳасида эълон қилинди.
Маълум қилинишича, Жиззах вилоятидаги туманлардан бирининг прокурори таъмирлаш ва ободонлаштириш ишлари билан шуғулланувчи ДУКнинг мансабдор шахслари ва бошқаларига нисбатан қўзғатилган жиноят иши доирасида қурилиш фирмаси раҳбарига қамоққа олиш эҳтиёт чораси қўлламасликни ваъда қилган. Шунингдек, у мазкур фирмада аниқланган камомад миқдорини камайтириб кўрсатиш учун ундан 2 минг доллар сўраган ва келишилган пулнинг 1,2 минг долларини олган. Туман прокурори сўралган пулнинг қолган 800 долларини олган вақтида ашёвий далиллар билан ушланган.
Шунингдек, Самарқанд вилоятидаги туман прокурорларидан бирининг ўринбосари маҳаллий фермер хўжалиги раҳбарига нисбатан суд томонидан тайинланган 3 йил озодликни чеклаш жазосини бошқа оғирроқ жазо турига ўзгартириш учун протест киритиб, суднинг апелляция босқичида ҳукмни ўз кучида қолдириш эвазига 10 минг доллар талаб қилади.
ДХХнинг вилоят бошқармаси томонидан ўтказилган тезкор тадбирда прокурор ўринбосарининг топшириғи билан унинг воситачиси сўралган пулни олган вақтида ушланган. Прокурор ўринбосарининг алоқадорлиги воситачиси берган кўрсатма асосида ўтказилган тадбирда ашёвий далиллар билан исботланган.
Наманган вилоятида эса туман МИБ раҳбари маҳаллий фуқарони Қирғизистондаги Жалолобод давлат университетидаги ўқишини Андижон давлат тиббиёт университетига Олий таълим вазирлигидаги танишлари орқали кўчиришда ёрдам беришини ваъда қилган. Хизмат эвазига у 700 доллар
ҳамда 1 миллион 50 минг сўмни олади. У қолган пулларни талаб қилиб, 200 доллар ва 1 миллион 50 минг сўм олган вақтида ашёвий далиллар билан қўлга олинган.
Мазкур шахсларга нисбатан Жиноят кодексининг тегишли моддалари билан жиноий ишлар очилган. Ҳозирда тергов ҳаракатлари олиб борилмоқда.
Аввалроқ Бухорода божхона инспектори хизмати эвазига 400 доллар олаётганида қўлга олингани, Наманганда фуқаронинг Қирғизистондаги ўқишини 6 минг доллар эвазига кўчириб беришни ваъда қилган талаба ва университет ўқитувчилари ушлангани тўғрисида хабар беригланди.
Изоҳ (0)