O‘zbekistonda 20—30-sentabr kunlari 4—5 yoshli bolalar poliomiyelitga qarshi ommaviy vaksinatsiyadan o‘tkaziladi. Bu haqda Sanitariya-epidemiologiya farovonligi va aholi salomatligi xizmatiga tayanib, “Gazeta.uz” xabar berdi.
Vaksinalarni mamlakatning davolash-profilaktika muassasalari emlash punktida olish mumkin. Bolalarni emlash uchun hududlarga 1,2 million doza inaktivlangan poliomiyelit vaksina yetkazib berilgan.
IPV-inaktivlangan poliomiyelit vaksinasi bilan bolalar 4 oyda bir marotaba emlanadi. Emlash bir marotabalik shpris bilan inyeksiya usulida o‘tkaziladi, vaksinaning bir dozasi — 0,5 ml mushak orasiga yuboriladi.
Farg‘ona viloyati SEO va JS xizmati Jahon sog‘liqni saqlash tashkilotining rasmiy ma’lumotlariga tayanib, Afg‘oniston va Tojikistonda sentabr oyida 31 ta holatda poliomiyelit virusining 2-tipi aniqlanganini ma’lum qilgandi.
SEO xizmati vaksinalar va immunoprofilaktika bo‘limi boshlig‘i Dilorom Tursunova bergan izohga ko‘ra, O‘zbekistonda oxirgi marotaba poliomiyelit holati 1995-yil Qoraqalpog‘istonda aniqlangan. “1996-yildan beri respublikada poliomiyelit holatlari uchramagan. JSST tavsiyalariga muvofiq 1997-yildan boshlab mamlakatga polio virus kirib kelishining oldini olish uchun poliomelit va o‘tkir paralichlar bo‘yicha faol epidemiologik kuzatuv olib borilmoqda”, — deydi u.
Shu yilning mart oyida Tojikiston va Afg‘onistonda poliomiyelit holatlari aniqlanganligi sababli Surxondaryo viloyatida 5 yoshgacha bo‘lgan bolalar o‘rtasida ommaviy emlash o‘tkazilgan.
Poliomiyelit nima?
JSST ma’lumotlariga ko‘ra, poliomiyelit viruslar keltirib chaqiradigan yuqori infeksiyali kasallik. Kasallik asab tizimini shikastlaydi bir necha soatlarda umumiy falajlikka olib kelishi mumkin. Poliomiyelit bilan asosan 5 yoshgacha bo‘lgan bolalar kasallanadi.Virus ifloslangan oziq-ovqat mahsulotlari va suv orqali o‘tadi, ichakda ko‘payadi va u yerdan asab tizimiga o‘tishi mumkin. Infeksiyalangan kishilarning aksariyatida kasallik alomatlari bo‘lmaydi, lekin virus ularda axlat orqali chiqib ketadi va shu orqali u boshqa odamlarga yuqishi mumkin.
Infeksiyaga chalinishning har 200 ta holatidan birida umrbod falajlik (asosan oyoqlarda) yuzaga keladi. Isitma, toliqish, bosh og‘rig‘i, qayd qilish, oyoq-qo‘llardagi og‘riqlar, bo‘yin qotib qolishi uning dastlabki alomatlaridir.
Poliomiyelit bedavo, uni faqat emlash orqali oldini olish mumkin. Bir necha marotaba yuborilgan vaksina bolani deyarli butun umri davomida himoya qiladi.
Eslatib o‘tamiz, O‘zbekiston bolalarni poliomiyelitdan himoya qilish maqsadida 2018-yilda 4 oylik bolalarga qilinadigan inaktivlashtirilgan poliomiyelit vaksinasi (IPV) tatbiq etilgandi.
Izoh (0)