Prezident 20-sentabr kuni “ ‘O‘zbekiston Respublikasi Sudyalar oliy kengashi to‘g‘risida’gi O‘zbekiston respublikasi qonuniga o‘zgartish va qo‘shimchalar kiritish haqida”gi qonunni imzoladi, deb xabar bermoqda Adliya vazirligi matbuot xizmati.
Qonunga kiritilgan o‘zgartirishlarga ko‘ra, kengash sudyalar orasida korrupsiya holatlarining oldini olib, ularni barvaqt aniqlash bo‘yicha chora-tadbirlar ko‘radi, sud tizimida aniqlangan har bir korrupsiya holatini ko‘rib chiqadi va prinsipial baholaydi.
Shuningdek, kiritilgan o‘zgartirishlarga ko‘ra, kengash sudyalar faoliyatini ochiq va shaffof elektron reyting dasturi asosida baholash mezonlarini aniqlash bo‘yicha chora-tadbirlar ko‘radi.
Qonun bilan kengash raisi o‘rinbosari vakolatlariga ham o‘zgartirishlar kiritildi. Unga ko‘ra, kengash raisi o‘rinbosari:
- sudyalar daxlsizligini ta’minlash va korrupsiyaning oldini olish bo‘yicha sud inspeksiyasining faoliyatiga rahbarlikni amalga oshiradi, uning faoliyati samaradorligini ta’minlash uchun javobgar bo‘ladi;
- axborot-kommunikatsiya texnologiyalarini joriy etishga, shuningdek axborot xavfsizligini ta’minlashga doir ishlarni tashkil etadi.
Prokuratura organlariga kiritilgan taqdimnoma 1 oy muddatda ko‘rib chiqiladi va kengash jinoyat ishi qo‘zg‘atilganligi to‘g‘risida yoki uni qo‘zg‘atish rad etilganligi haqida Bosh prokuratura tomonidan xabardor qilinadi.
Eslatib o‘tamiz, 2020-yilning 7-dekabrida “Sudyalarning chinakam mustaqilligini ta’minlash hamda sud tizimida korrupsiyaning oldini olish samaradorligini oshirish chora-tadbirlari to‘g‘risida”gi Prezident farmoni qabul qilingandi. Unda sudyalar daxlsizligini ta’minlash va korrupsiyaning oldini olish bo‘yicha inspeksiya tuzilishi belgilangandi.
Izoh (0)