Meksikada El Chapo laqabli narkobaron Xoakin Gusmanning uyi milliy lotereyada o‘ynaldi. 2014-yilda El Chapo aynan shu uydan qochib ketgandi, deb yozadi Daily Mail.
Maydoni 395 kvadrat metr bo‘lgan uy Meksikaning Sinaloa shtati poytaxti Kulyakan shahrida joylashgan. Bino ichida ikkita yotoqxona, mehmonxona, garaj va maxfiy yerosti yo‘li bor, vannadan qo‘shni uyga olib o‘tuvchi ushbu tunnel orqali Guzman 2014-yilda politsiyadan qochgan.
Meksika dengiz piyodalarining hujumida bir oz shikastlangach, uy qayta ta’mirlandi va undagi o‘nlab videokuzatuv kameralari olib tashlandi, bu kameralar yordamida El Chapo atrofni kuzatgan.
Uy bilan birga El Chaponing jami 20 ta uchastkasi musodara qilingan. Uyning yangi egasining shaxsi sir saqlanmoqda, biroq lotereya chiptasi 12 dollar (128 ming so‘m) turardi. Ilgari uy 130 ming dollarga kimoshdiga qo‘yilgandi, lekin uni sotib oladigan odam chiqmagan. Hozir ko‘chmas mulk 183 ming dollarga baholanmoqda.
63 yoshli Gusman — “Sinaloa” giyohvand moddalar kartelining rahbari. 2014-yil fevraligacha AQSh Adliya vazirligi uni dunyodagi eng qudratli narkobaron deb atagan. Narkobaron ikki marta qamoqdan qochishga muvaffaq bo‘lgan. Birinchi safar u Gvatemala hukumati tomonidan 1993-yilda hibsga olinib, Meksikaga ekstraditsiya qilingan edi. U yerda sud narkobaronni 20 yilga ozodlikdan mahrum qildi. Ammo 2001-yili narkobaron soqchilarning barchasini sotib olib, qamoqdan qochib ketdi.
Unga 2014-yilda ikkinchi bor hukm o‘qilgan. O‘shanda narkobaron maxsus qo‘riqlanadigan qamoqxonaga joylashtirilgan edi. Ammo 2015-yil iyul oyida u yerdan qochib qutulgan: uning kamerasi ostida bir yarim kilometrlik yerosti yo‘li topilgan.
2016-yil yanvar oyida Gusman yana Meksika hukumati tomonidan hibsga olindi. El Chapo u yerda tushkunlikda ekanini bildirganida, buni yengish uchun qamoqxona rahbariyati unga Migel de Servantesning “Don Kixot” kitobini berdi. Bir yil o‘tgach esa u AQShga ekstraditsiya qilindi. Qo‘shma Shtatlar 2019-yil iyul oyida narkobaronni umrbod qamoq jazosiga mahkum etdi va yana 30 yilga ozodlikdan mahrum qildi.
Izoh (0)