Qirg‘izistondagi Qumtor oltin konini qazish bilan bog‘liq korrupsiya ishi doirasida Kanadaning Centerra Gold Inc kompaniyasi hamda “Qumtor Gold Kompani” yopiq aksiyadorlik jamiyatining sobiq rahbarlari xalqaro qidiruvga berildi.
Qirg‘iziston Milliy xavfsizlik davlat qo‘mitasi (GKNB) matbuot xizmatining xabar berishicha, tergov 2013-yilning dekabr oyida “Centerra Gold” va “Kumtor Gold Kompani” YoAJning xorij fuqarolaridan iborat rahbariyati 200 million dollar mablag‘ni o‘zlashtirishga va uni chet el kompaniyasi hisobiga o‘tkazishga aloqadorligi to‘g‘risida rad etib bo‘lmaydigan dalillarni qo‘lga kiritgan.
Tergov tomonidan quyidagilar sirtdan jinoiy javobgarlikka tortildi va qidiruvga berildi:
- Centerra Gold kompaniyasining sobiq prezidenti Yan Atkinson;
- “Qumtor Gold Kompani” YoAJ sobiq prezidenti va boshqaruv raisi Maykl Fisher va Andrey Sazanov;
- “Kumtor Operating Kompani” YoAJning moliyaviy masalalar bo‘yicha sobiq vitse-prezidenti Jon Syuter.
Avvalroq “Qumtor” loyihasini amalga oshirishda yo‘l qo‘yilgan korrupsiya ishini tergov qilish doirasida Qirg‘izistonning 19-bosh vaziri Jo‘mart Otorboyev hibsga olingandi. Undan avval Qirg‘izistonning yana ikki sobiq bosh vaziri Temir Sariyev va Omurbek Babanov Qumtor ishi bo‘yicha hibsga olingan. Shuningdek, Qirg‘izistonning birinchi va ikkinchi prezidentlari Asqar Akayev va Qurmanbek Bakiyevlar iyul oyi boshlarida Qumtor ishi bo‘yicha xalqaro qidiruvga berilgan. Asqar Akayev 2-avgust kuni Qirg‘izistonga qaytdi. U Milliy xavfsizlik davlat qo‘mitasida so‘roq qilinganidan keyin mamlakatni yana tark etdi.
May oyi oxirida Qirg‘izistonda yana ikki nafar sobiq davlat amaldori korrupsiyada ayblanib hibsga olingan. Ulardan biri Qirg‘iziston parlamentining sobiq raisi va sobiq prezident So‘ronbay Jeenbekovning ukasi Asilbek Jeenbekovdir.
Ayni paytda Qirg‘iziston Milliy xavfsizlik davlat qo‘mitasi Bosh prokuratura bilan birgalikda “Qumtor” loyihasi bo‘yicha kelishuvlarni bekor qilish jarayonini boshlagan.
Izoh (0)