Fransiya AQSh bilan birga Chesapik dengiz jangining 240 yilligiga bag‘ishlangan tantanalarni nishonlashdan bosh tortdi. Fransiya ushbu qarorni Avstraliya Fransiyaning suvosti kemasini ishlab chiqaruvchi kompaniyasi bilan shartnomani bekor qilib, Buyuk Britaniya va AQSh bilan mudofaa alyansini tuzishga kelishib olganidan so‘ng qabul qilgan.
Chesapik jangi (AQSh mustaqilligi uchun dengizda kechgan hal qiluvchi jang)ning yubileyiga bag‘ishlangan tadbirlar 17-sentabr, juma kuniga rejalashtirilgan edi. Tantanalarga Fransiya dengiz flotining Vashingtonda bo‘lib turgan yuqori martabali vakili tashrif buyurishi kerak edi, lekin u muddatidan oldin Parijga qaytishga qaror qildi.
Boshqa tadbirlar, jumladan, Merilend shtatining Baltimor va Annapolis shaharlaridagi fransuz fregatining bortida gulchambar qo‘yish marosimi bekor qilinmadi, deb xabar beradi CNBC Fransiya rasmiylariga tayanib.
Avvalroq Avstraliya, AQSh va Buyuk Britaniya yangi mudofaa alyansi — AUKUS’ni tuzgan edi. AUKUS’ning ilk yirik tashabbusi Avstraliyani atomli suvosti floti bilan qurollantirish bo‘ldi. Yangi hamkorlik fonida Avstraliya Fransiyaning Naval Group harbiy kemasozlik kompaniyasi bilan tuzgan rekord darajada qimmat shartnomani to‘xtatdi.
Avstraliya uni 2016-yilda imzolagan, shartnoma 12 ta oddiy suvosti kemasini qurishni nazarda tutgan. Loyihaga 90 milliard Avstraliya dollari (66 milliard AQSh dollari) talab qilinib, bu shartnoma Avstraliya dengiz floti tarixidagi eng qimmati bo‘lardi. Shartnoma nafaqat suvosti kemalarini yetkazib berishni, balki ularni bazalash uchun infratuzilma yaratishni, shuningdek, ekipajlarni texnik qo‘llab-quvvatlash va 50 yil davomida o‘qitishni nazarda tutgandi.Fransiya tashqi ishlar vaziri Jan-Iv Le Drian shartnomaning bekor qilinishini “orqadan pichoq urish” deb atadi.
Izoh (0)