Мексикада Эл Чапо лақабли наркобарон Хоакин Гусманнинг уйи миллий лотереяда ўйналди. 2014 йилда Эл Чапо айнан шу уйдан қочиб кетганди, деб ёзади Daily Mail.
Майдони 395 квадрат метр бўлган уй Мексиканинг Синалоа штати пойтахти Кулякан шаҳрида жойлашган. Бино ичида иккита ётоқхона, меҳмонхона, гараж ва махфий ерости йўли бор, ваннадан қўшни уйга олиб ўтувчи ушбу туннел орқали Гузман 2014 йилда полициядан қочган.
Мексика денгиз пиёдаларининг ҳужумида бир оз шикастлангач, уй қайта таъмирланди ва ундаги ўнлаб видеокузатув камералари олиб ташланди, бу камералар ёрдамида Эл Чапо атрофни кузатган.
Уй билан бирга Эл Чапонинг жами 20 та участкаси мусодара қилинган. Уйнинг янги эгасининг шахси сир сақланмоқда, бироқ лотерея чиптаси 12 доллар (128 минг сўм) турарди. Илгари уй 130 минг долларга кимошдига қўйилганди, лекин уни сотиб оладиган одам чиқмаган. Ҳозир кўчмас мулк 183 минг долларга баҳоланмоқда.
63 ёшли Гусман — «Синалоа» гиёҳванд моддалар картелининг раҳбари. 2014 йил февралигача АҚШ Адлия вазирлиги уни дунёдаги энг қудратли наркобарон деб атаган. Наркобарон икки марта қамоқдан қочишга муваффақ бўлган. Биринчи сафар у Гватемала ҳукумати томонидан 1993 йилда ҳибсга олиниб, Мексикага экстрадиция қилинган эди. У ерда суд наркобаронни 20 йилга озодликдан маҳрум қилди. Аммо 2001 йили наркобарон соқчиларнинг барчасини сотиб олиб, қамоқдан қочиб кетди.
Унга 2014 йилда иккинчи бор ҳукм ўқилган. Ўшанда наркобарон махсус қўриқланадиган қамоқхонага жойлаштирилган эди. Аммо 2015 йил июль ойида у ердан қочиб қутулган: унинг камераси остида бир ярим километрлик ерости йўли топилган.
2016 йил январь ойида Гусман яна Мексика ҳукумати томонидан ҳибсга олинди. Эл Чапо у ерда тушкунликда эканини билдирганида, буни енгиш учун қамоқхона раҳбарияти унга Мигел де Сервантеснинг «Дон Кихот» китобини берди. Бир йил ўтгач эса у АҚШга экстрадиция қилинди. Қўшма Штатлар 2019 йил июль ойида наркобаронни умрбод қамоқ жазосига маҳкум этди ва яна 30 йилга озодликдан маҳрум қилди.
Изоҳ (0)