Amnesty International inson huquqlarini himoya qilish tashkiloti Rossiya muxolifati yetakchisi Aleksey Navalniyga “vijdon mahbusi” maqomini qaytarish niyatida. Bu haqda siyosatchining sherigi Leonid Volkov Kanada jamoatchilik palatasining tashqi aloqalar qo‘mitasi oldidagi chiqishida aytib o‘tdi, deb yozadi Meduza.
Foto: “TASS”
Volkovning so‘zlariga ko‘ra, Amnesty tegishli press-relizni 12-may kuni — “bunga Rossiyaning dezinformatsiya kampaniyasi qanday ta’sir qilishi mumkinligini tekshirgandan so‘ng” e’lon qiladi.
Tashkilotning Rossiyadagi vakolatxonasi Volkovning so‘zlariga izoh berishdan bosh tortgan.
Ma’lumot uchun “vijdon mahbusi” atamasi 1960-yillarning boshida Amnesty International xalqaro inson huquqlarini himoya qilish tashkilotining asoschisi, britaniyalik advokat va inson huquqlari himoyachisi Piter Benenson tomonidan kiritilgan. Bu atama hibsga olingan yoki ozodlikdan mahrum qilingan shaxslarning siyosiy, diniy yoki ilmiy qarashlarini tinch yo‘l bilan ifoda etishini anglatadi. O‘z navbatida zo‘ravonlik bilan shug‘ullanadigan yoki kuch ishlatish va adovatni targ‘ib qiluvchilar “vijdon mahbusi” hisoblanmaydi.
2021-yil yanvarda Aleksey Navalniy Berlindan Moskvaga kelgan payt hibsga olingandan so‘ng, Amnesty International siyosatchini “vijdon mahbusi” deb tan olib, uni zudlik bilan ozod qilishni talab qilgan edi. Bir oy o‘tgach, tashkilot ushbu maqomni bekor qildi, bunga siyosatchining 2000-yillarda bergan muhojirlar haqidagi bayonotlari sabab bo‘lgan bo‘lishi mumkin. Mart oyida Amnesty Navalniyni qo‘llab-quvvatlash uchun yangi bayonot chiqarib, uning Pokrov shahridagi koloniyada saqlanishini qoraladi.
29-mart kuni BMTning Aleksey Navalniyning zaharlanishi bo‘yicha maxsus ma’ruzachisi bo‘lgan Anyes Kallamar Amnesty International tashkilotining yangi bosh kotibi etib tayinlandi.
Navalniy 31-martda ochlik e’lon qilgandi. U mazkur qarorini sog‘lig‘i yomonlashganiga qaramay yoniga fuqarolik tibbiyoti tizimidagi shifokorlar kiritilmayotganiga norozilik deya izohlagan. Rossiya prezidenti Vladimir Putinning matbuot xizmati Navalniyning ochlik e’lon qilishiga izoh berishdan bosh tortgan.
21-aprelda Rossiyada “Navalniyga ozodlik” nomli norozilik namoyishlari o‘tkazildi. Siyosatchining tarafdorlari Navalniyning shifokorlari uning sog‘lig‘i yomonlashganini xabar qilganidan keyin mamlakatdagi odamlarni ko‘chalarga chiqib, norozilik namoyishlarini o‘tkazishga chorladi.
24-aprelda Aleksey Navalniy norozilik sifatida e’lon qilgan ochligini to‘xtatdi.
