20 йил аввал 11 сентябрь куни АҚШда террорчилар гуруҳи тўртта йўловчи самолётини эгаллаб олганди. Худкуш жангарилар иккита лайнерни Нью-Йоркдаги Жаҳон савдо марказининг эгизак биноларига, яна бир самолётни Вашингтондаги Пентагон биносига йўналтирган, тўртинчи самолёт Пенсильваниядаги Шанксвилл шаҳрида ерга қулаган. Терактлар оқибатида 2,9 мингдан зиёд одам жабр кўрган. «Ал-Қоида» террорчилик ташкилоти мазкур қўпорувчилик ҳаракатлари учун масъулиятни ўз зиммасига олганди. «РБК» АҚШда мазкур террорчилик ҳаракатлари оқибатида ҳалок бўлган минглаб одамлар қандай хотирлангани ҳақида фоторепортажни тақдим этди.
11 сентябрь куни АҚШдаги даҳшатли терактлар содир этилганига 20 йил тўлди. АҚШ президенти Жо Байден мамлакатдаги давлат байроқларини тушириш ва 10–12 сентябрь кунларини ибодат ва хотира кунлари сифатида ўтказиш ҳақида фармойиш чиқарди.
Байден сана муносабати билан Америка халқига видеомурожаат йўллади, унда фуқароларни фожианинг 20 йиллиги муносабати билан бирдам бўлишга чақирди. «Бирдамлик — биздаги буюк куч. Бу бизни ўзлигимизга қайтаради. Ким эканлигимизни ҳеч қачон унутмаслигимиз керак», — деган президент.
Нью-Йоркда терактлардан аввал эгизак бинолар бўлган жойда қурилган хотира мажмуаси, Пентагон биноси ўрнидаги жой, шунингдек, Шанксвилда самолёт қулаган ерда хотира тадбирлари ўтказилди.
Маросимларда эгизак биноларга самолётлар урилгани, Пентагонга ҳужум уюштирилгани, Пенсильванияга самолёт қулагани муносабати билан қурбонлар хотирасига ҳурмат тарзида олти бор сукут сақлаш сўралди.
Байден рафиқаси Жилл билан биргаликда Нью-Йоркдаги мотам маросимларига келди, АҚШ собиқ президентлари Барак Обама ҳамда Билл Клинтон ҳам рафиқалари билан бирга тадбирларда иштирок этди.
Маросимларда рок-мусиқачи Брюс Спрингстин ҳам қатнашди. Қўшиқчи I’ll See You in My Dreams («Сени тушларимда кўраман») композициясини ижро этди.
Терактларда ҳалок бўлганларнинг қариндошлари қўнғироқлар бирма-бир чалинган вақтда қурбонларнинг исмларини айтиб уларни хотирлади.
20 йиллик арафасида Нью-Йоркда яна икки нафар қурбон 2001 йилда содир бўлган терактларда ҳалок бўлганлар рўйхатига қўшилди. Шу тариқа ҳалок бўлганларнинг умумий сони 1647 нафарни ташкил қилмоқда, портлашдан кейин ўлганларнинг 40 фоизи яъни 1106 нафар одамнинг шахсини аниқлашнинг имкони бўлмаган.
Мавзуга доир: «11 сентябрь болалари»: кимдир отасининг сўнгги соатларидан ҳамон таъқибда, бошқаси ҳар йилги мотам маросимидан зада
Мавзуга доир: АҚШ махфий хизмати 11 сентябрь воқеаларини акс эттирувчи илгари чоп этилмаган фотосуратларни эълон қилди
Портлаб кетган эгизак бинолар яқинида сана муносабати билан ушбу бинолар рамзи сифатида нур устунлари бунёд қилинди.
Изоҳ (0)