Afg‘onistonda hokimiyat tepasiga kelgan “Tolibon” harakati mamlakat muvaqqat hukumatining inauguratsiya marosimini bekor qildi. Bu haqda 10-sentabr kuni toliblarning madaniyat komissiyasi a’zosi Inamulloh Samanganiy ma’lum qildi.
“Afg‘oniston yangi hukumatining inauguratsiya marosimi bir necha kun oldin bekor qilingan. Odamlarni ortiq gangitmaslik maqsadida ‘Afg‘oniston Islom Amirligi’ rahbariyati kabinetning bir qismini e’lon qildi va u allaqachon ish boshlagan”,— deb yozdi harakat vakili Twitter’dagi sahifasida, shuningdek, u kelgusida marosimni o‘tkazish imkoniyatiga aniqlik kiritmadi.
Bundan tashqari, Samanganiy Vazirlar Mahkamasining inauguratsiyasi 11-sentabrga rejalashtirilgani haqida avvalroq tarqatilgan ma’lumotni rad etib, ularni mish-mish deb atadi.
7-sentabr kuni “Tolibon” harakati Afg‘oniston hukumatining yangi tarkibini e’lon qildi. Harakat matbuot kotibi Zabihulla Mujohid Vazirlar Mahkamasining a’zolari ro‘yxatini ommaga taqdim qilgan, uning o‘zi hukumatda madaniyat va axborot vaziri lavozimini egallaydi.
Qayd etilishicha, Muhammad Hasan Ohund “Tolibon” tuzgan yangi hukumatning rahbari bo‘ladi. Mulla Abdul G‘ani Barodar bosh vazir o‘rinbosari bo‘ladi. “Haqqoniy tarmog‘i” guruhi asoschisining o‘g‘li Sirojiddin Haqqoniy esa ichki ishlar vaziri lavozimini egallaydi. “Tolibon” asoschilaridan birining o‘g‘li Umar Yoqub mudofaa vaziri bo‘ladi.
Yevropa Ittifoqi Afg‘oniston muvaqqat hukumati tarkibidan xavotir bildirdi. Ittifoq fikricha, “Tolibon” inklyuziv hukumat tuzish haqidagi va’dasini bajara olmagan.
O‘z navbatida, toliblar rahbari Haybatulla Ohunzodaning bayonotiga ko‘ra, “Tolibon” muvaqqat hukumati shariat qonunlarini qo‘llab-quvvatlaydi, inson huquqlarini himoya qiladi va xorijiy sarmoyalar uchun imkoniyat yaratadi. Bu Ohunzodaning u 2016-yilda “Tolibon”ga rahbarlik qilishni boshlaganidan buyon birinchi shaxsiy bayonoti.
Izoh (0)