Daniya koronavirusga qarshi cheklovlarni butunlay bekor qilgan birinchi Yevropa davlati bo‘ldi. Mamlakatda COVID-19 infeksiyasini o‘ta xavfli kasallik deb belgilovchi nizomning amal qilish muddati bugun, 10-sentabrdan tugaydi. Bu haqda Politico nashri xabar berdi.
Ushbu nizomning bekor qilinishi bilan birga, cheklovlarni bosqichma-bosqich olib tashlash to‘g‘risidagi kelishuv ham amal qilishdan to‘xtaydi. Kelishuvga ko‘ra, mamlakatda qolgan barcha cheklov choralariga rioya qilish 1-oktabrdan bekor qilinishi kerak edi.
Endi butun mamlakat bo‘ylab restoranlarga, sport zallariga va tungi klublarga kirish uchun ruxsatnoma talab qilinmaydi, bolalar COVID-19 bilan kasallangan odam bilan muloqotda bo‘lganidan keyin darhol uyga yuborilmaydi. Karantin faqat koronavirusga chalinganlar uchun amal qiladi. Sog‘lom fuqarolar ofislarga, bolalar esa maktablarga qaytishi mumkin bo‘ladi.
Hukumatning barcha sanitariya choralarini 10-sentabrgacha bekor qilish niyati avgust oyi oxirida ma’lum bo‘ldi. Daniya sog‘liqni saqlash vazirligi tomonidan tegishli byulleten tarqatildi. Qirollik Sog‘liqni saqlash vazirligi rahbari Magnus Xoynike mamlakatda vaksinatsiya darajasini juda yuqori deb baholadi. U, shuningdek, cheklovlar olib tashlanganidan keyin, agar mamlakatda epidemiologik vaziyat birdan yomonlashsa, qayta karantin joriy qilinishi mumkinligini tan oldi.
26-iyundan Islandiya hukumati koronavirusga qarshi cheklovlarning barchasini bekor qilgandi. O‘sha paytdagi holatga ko‘ra, mamlakatda voyaga yetgan aholining 87 foizi emlangan.
Shuningdek, o‘sha kuni Ispaniyada ko‘chada niqob taqish majburiyati bekor qilingandi. Ispaniya Sog‘liqni saqlash vaziri Karolina Dariasning so‘zlariga ko‘ra, fuqarolar 1,5 metr ijtimoiy masofani saqlash sharti bilan ochiq havoda niqob taqishi shart emas. Biroq savdo ko‘chalari singari gavjum joylarda yoki katta tadbirlarda niqobdan foydalanish kerak bo‘ladi.
Turkiyada esa 1-iyuldan komendantlik soati to‘liq bekor qilingan.
Izoh (0)