Афғонистонда ҳокимият тепасига келган «Толибон» ҳаракати мамлакат муваққат ҳукуматининг инаугурация маросимини бекор қилди. Бу ҳақда 10 сентябрь куни толибларнинг маданият комиссияси аъзоси Инамуллоҳ Саманганий маълум қилди.
«Афғонистон янги ҳукуматининг инаугурация маросими бир неча кун олдин бекор қилинган. Одамларни ортиқ гангитмаслик мақсадида ‘Афғонистон Ислом Амирлиги’ раҳбарияти кабинетнинг бир қисмини эълон қилди ва у аллақачон иш бошлаган»,— деб ёзди ҳаракат вакили Twitter’даги саҳифасида, шунингдек, у келгусида маросимни ўтказиш имкониятига аниқлик киритмади.
Бундан ташқари, Саманганий Вазирлар Маҳкамасининг инаугурацияси 11 сентябрга режалаштирилгани ҳақида аввалроқ тарқатилган маълумотни рад этиб, уларни миш-миш деб атади.
7 сентябрь куни «Толибон» ҳаракати Афғонистон ҳукуматининг янги таркибини эълон қилди. Ҳаракат матбуот котиби Забиҳулла Мужоҳид Вазирлар Маҳкамасининг аъзолари рўйхатини оммага тақдим қилган, унинг ўзи ҳукуматда маданият ва ахборот вазири лавозимини эгаллайди.
Қайд этилишича, Муҳаммад Ҳасан Оҳунд «Толибон» тузган янги ҳукуматнинг раҳбари бўлади. Мулла Абдул Ғани Бародар бош вазир ўринбосари бўлади. «Ҳаққоний тармоғи» гуруҳи асосчисининг ўғли Сирожиддин Ҳаққоний эса ички ишлар вазири лавозимини эгаллайди. «Толибон» асосчиларидан бирининг ўғли Умар Ёқуб мудофаа вазири бўлади.
Европа Иттифоқи Афғонистон муваққат ҳукумати таркибидан хавотир билдирди. Иттифоқ фикрича, «Толибон» инклюзив ҳукумат тузиш ҳақидаги ваъдасини бажара олмаган.
Ўз навбатида, толиблар раҳбари Ҳайбатулла Оҳунзоданинг баёнотига кўра, «Толибон» муваққат ҳукумати шариат қонунларини қўллаб-қувватлайди, инсон ҳуқуқларини ҳимоя қилади ва хорижий сармоялар учун имконият яратади. Бу Оҳунзоданинг у 2016 йилда «Толибон»га раҳбарлик қилишни бошлаганидан буён биринчи шахсий баёноти.
Изоҳ (0)