Pokiston o‘zining “Tolibon” Afg‘onistonning Panjsher viloyatida nazoratni qo‘lga kiritishida ishtirok etgani haqidagi ayblovlarni rad etdi. Bu haqda mamlakat Tashqi ishlar vazirligi vakili Asim Iftixorga tayanib, “TASS” xabar berdi.
TIV vakilining so‘zlariga ko‘ra, ayrim ommaviy axborot vositalari tarqatayotgan bunday bayonotlar Pokistonga qarshi “targ‘ibot kampaniyasi” va xalqaro hamjamiyatni yo‘ldan ozdirish uchun “bemulohaza urinishlar”ning bir qismidir.
Iftixorning ta’kidlashicha, Hindiston ommaviy axborot vositalarining veb-saytlarida e’lon qilingan bir qator yangiliklar allaqachon rad etilgan.
Avvalroq Hindistonning Pioneer gazetasi Pokiston Harbiy havo kuchlari samolyotlari va mamlakat maxsus kuchlari bo‘linmalari “Tolibon” operatsiyasiga Panjsher viloyatini egallashda harbiy yordam ko‘rsatgani haqida xabar bergandi.
“Tolibon” hokimiyatga kelmasidan avvalroq esa Afg‘onistonning BMTdagi doimiy vakili G‘ulom Isxakzay “Tolibon”ni Pokiston qo‘llab-quvvatlayotganiga dalillar borligini aytgan edi. Pokiston ushbu da’volarni rad etgan hamda mamlakat “Tolibon”ga Afg‘onistonga hujum qilish uchun o‘z hududidan foydalanish imkoniyatini bermasligini ma’lum qilgan.
7-avgust kuni AQSh prezidenti Jo Bayden jurnalistlarga Xitoy, Rossiya, Pokiston va Eron “Tolibon”bilan muzokara olib borishga urinayotgani haqida aytdi.
“Xitoyning ‘Tolibon’ bilan haqiqatan muammolari bor. Shu sababli Xitoy ular bilan muzokara olib borishga harakat qilayotganiga ishonchim komil. Pokiston, Rossiya, Eron ham shunday. Ularning hammasi hozir qanday yo‘l tutishni aniqlashga harakat qilmoqda”, — degan Bayden.
Izoh (0)